Радий Хәбиров Хөкүмәттең оператив кәңәшмәһендә федераль әһәмиәттәге мәҙәни мираҫ объекты булған Салауат Юлаев һәйкәле тураһында һөйләне.

Республика Башлығы үткән аҙнала Рәсәй Художестволар академияһы президенты Василий Церетели менән осрашыу үткәнен, унда Салауат Юлаев һәйкәлен реставрациялау мәсьәләһе тикшерелеүен әйтте. "Барығыҙ ҙа беләһегеҙ, беҙ ике йыл дауамында Салауат Юлаев һәйкәле торошона бәйле хәлде тикшерәбеҙ һәм анализлайбыҙ. Ҡыҙғанысҡа ҡаршы, һәйкәлдең йәше лә, атмосфера йоғонтоһо ла, технологик үҙенсәлектәр ҙә реставрация яһауҙы талап итә, - тине Радий Хәбиров. - Әлеге ваҡытта эштәрҙең графигын билдәләнек, финанслау сығанаҡтары бар".
Реставрация этаптары тураһында Хөкүмәттең вице-премьеры Рөстәм Ғәзизов һөйләне. Уның һүҙҙәренсә, Башҡортостандың тарихи символын һаҡлап ҡалыу маҡсатында комплекслы фәнни тикшеренеүҙәр үткәрелгән: тарихи-архив, библиографик, архитектура-археологик үлсәүҙәр, инженер-химик-технологик тикшеренеүҙәр. Һәйкәл материалдарының торошо, аэродинамик характеристикалары өйрәнелгән, инженер тикшеренеүҙәр үткәрелгән. Эксперттар һығымтаһы буйынса, һәйкәлде һаҡлау өсөн тиҙ арала эштәр башҡарыу талап ителә.
Һәйкәлде һаҡлау өс этапта үтәсәк. Беренсе этап - әҙерлек: майҙанды ҡойоу, төҙөлөш ҡоролмаларын урынлаштырыу, махсус техника йыйыу, скульптураны демонтажға әҙерләү. Был этап 2025 йылдың сентябрендә тамамланасаҡ. - Эштәр өсөн ауыр техника кәрәк буласаҡ, шуға күрә 30 июндән майҙанға инеү тулыһынса ябыла һәм бөтә эштәр тамамланғансы ябыҡ буласаҡ, - тине Рөстәм Ғәзизов. - Икенсе этап (2025 йылдың октябренән 2027 йылдың апреленә тиклем) - иң мөһиме һәм ҡатмарлыһы: һәйкәлде демонтажлау, реставрациялау һәм яңыртып ҡуйыу. Реставрация Өфө ҡалаһындағы махсус цехта үтәсәк.
Өсөнсө этапта (2027 йылдың апреленән сентябренә тиклем) фонтанды һәм Салауат Юлаев майҙанын яңыртыу ҡаралған. Вице-премьер билдәләүенсә, майҙан һуңғы тапҡыр 2007 йылда яңыртылған, шуға яңыртыу кәрәк.
План буйынса, яңыртылған һәйкәлде һәм майҙанды тантаналы асыу 2027 йылдың октябрендә, скульптор Сосланбәк Тавасиев эшләгән һәйкәлдең 60 йыллығына тура киләсәк.
Радий Хәбиров бөтә эштәрҙе Рәсәй Художестволар академияһы эксперттары һәм йәмәғәт комиссияһы күҙәтеүе аҫтында башҡарырға ҡушты.

Ләйлә АРАЛБАЕВА.
"Киске Өфө" гәзите, №22, 6 - 12 июнь 2025 йыл

КИРЕ СЫҒЫРҒА