"Киске Өфө" - ул минең өсөн рухи аҙыҡ, күңелемде, йөрәгемде йылытҡан баҫма. Был гәзитте уҡығанда үҙ халҡыңдың тарихы, мәҙәниәте, ғөрөф-ғәҙәттәре, милли геройҙары тураһында беләһең, улар менән ғорурланаһың.

"Киске Өфө"нө сыға башлаған йылдарҙан алып уҡыйым. Республика яңылыҡтары, ауыл тормошо, милли байрамдар, халҡыбыҙҙың яулаған уңыштары һәм борсоған мәсьәләләр тураһында мәғлүмәт еткерә ул миңә.
Милли баҫманың төп ҡиммәте - телде һаҡлау, йәш быуында туған телгә, илгә һөйөү тәрбиәләү. "Киске Өфө"ләге ниндәй генә рубриканы алма, уларҙағы материалдар башҡорт халҡының асылын аса, республикалағы яҡшы яңылыҡтарҙы яҡтырта, тәнҡиткә лә ишаралай, тарихи хәтеребеҙҙе яңырта. Шулай уҡ ул ололарға ихтирам, изгелек, тырышлыҡ, тыуған ергә тоғролоҡ кеүек сифаттар тәрбиәләй. "Киске Өфө" гәзитен мин халҡыбыҙҙың рухи хазинаһын, быуындан-быуынға күскән ҡиммәттәрен һаҡлаусы, халыҡ хәтерен тергеҙеүсе баҫма тип ҡабул итәм һәм йыл һайын яҙылам.
"Киске Өфө"нөң тағы бер мөһим үҙенсәлеге - уның халыҡты берләштереү, милли үҙаңды уятыу, илһөйәрлек рухын нығытыуҙағы роле. Гәзитте уҡып, мин үҙемде башҡорт милләтенең айырылғыһыҙ бер өлөшө итеп тоям, милли асылымды тағы ла нығыраҡ аңлайым.
"Киске Өфө" - ул беҙҙең өсөн маяҡ, рухи терәк. Ул киләсәк быуынға милли рухыбыҙ асылын тапшыра. Шуға күрә мин уны даими уҡып барам, унан рух, дәрт алам. Ул - беҙҙең күңел көҙгөһө, рухи ҡиммәттәребеҙҙең һаҡсыһы.

Таңһылыу МӘЖИТОВА,
Мәләүез районы Үрге Юлдаш ауылы ағинәйе.
"Киске Өфө" гәзите, №24, 20 - 26 июнь 2025 йыл

КИРЕ СЫҒЫРҒА