Өфөлә математика лицей-интернаты төҙөлөшө башланды. Проект "Йәштәр һәм балалар" федераль милли проекты сиктәрендә республика Башлығы Радий Хәбиров инициативаһы менән тормошҡа ашырыла.

Мәктәп Менделеев урамында, "Өфө Экспо" күргәҙмә комплексынан алыҫ түгел ерҙә күтәрелә. Лицей 360 уҡыусыға иҫәпләнгән. Заманса уҡыу корпустарынан тыш, тулыһынса йыһазландырылған һәм бөтә уңайлыҡтары булған 250 урынлыҡ торлаҡ блоктары, спорт зонаһы, ашхана, китапхана ҡаралған. Проектың хаҡы - 2,8 миллиард һум. 465 миллион һумды республика бүлһә, ҡалған сумманы федераль үҙәк бирә. Лицей 2027 йылдың 6 декабренә тиклем файҙаланыуға тапшырылырға тейеш. Башҡортостандың төҙөлөш һәм торлаҡ-коммуналь хужалығы министры Артем Ковшов һөйләүенсә, бөгөнгө көнгә дөйөм әҙерлек эштәре башҡарылған, интернаттың торлаҡ өлөшөнөң нигеҙен ҡаҙа башлағандар.
Иҫегеҙгә төшөрәбеҙ, Башҡортостан Башлығы Радий Хәбиров осрашыу ваҡытында Президент Владимир Путинды математика лицейы төҙөлөшө проекты менән таныштырҙы. "Беҙ Өфөлә федераль бюджет иҫәбенә математика лицей-интернатын төҙөй башлаясаҡбыҙ. Был мәсьәлә буйынса мин ил Президентына мөрәжәғәт иттем, һәм унан хуплау таптыҡ. Республиканың һәләтле балалары өсөн заманса үҙәк булдырасаҡбыҙ. Ул сығарылыш уҡыусылары менән тотош илебеҙ ғорурланған уникаль мәктәп буласаҡ", - тип белдергәйне республика Башлығы 2024 йылдың декабрендә үҙенең Дәүләт Йыйылышы - Ҡоролтайға Мөрәжәғәтнамәһендә.

"Киске Өфө" гәзите, №28, 18 - 24 июль 2025 йыл

КИРЕ СЫҒЫРҒА