Шишмә районындағы Рәсәй Геройы Максим Серафимов исемендәге "Патриот" хәрби-патриотик паркы биләмәһендә Башҡортостан Башлығы Радий Хәбиров "Башҡортостан геройҙары" программаһы финалсылары менән осрашты.

"Башҡортостан геройҙары" республика кадрҙар проекты - ил Президенты тәҡдим иткән "Геройҙар ваҡыты" федераль программаһының аналогы. Программаның төп маҡсаты - МХО-ла ҡатнашыусыларға тыныс тормошҡа яраҡлашырға ярҙам итеү, республика ҡалалары һәм райондары иҡтисадын һәм социаль өлкәһен үҫтереүгә һәләтле белгестәр һәм идарасылар командаһын әҙерләү. "Башҡортостан геройҙары" программаһы республикала быйыл февралдә старт алды. 70 ҡатнашыусы финалға үтте.
-"Ҡатнашыусыларҙы теркәү һаны буйынса беҙ илдә беренсе урынды алдыҡ. Был МХО ветерандарының беҙҙең проектҡа ышанысы, республика үҫешенә үҙ өлөшөн индерергә әҙерлеге хаҡында һөйләй. Проект сиктәрендә һеҙ ғәмәлдәге ҡануниәт, хәҙерге шарттарҙа дәүләт һәм муниципаль идара итеү практикаһы, милли проекттар, дәүләт, шул иҫәптән республика программалары тураһында белемегеҙҙе арттырырһығыҙ. Иҡтисад тармаҡтары, социаль өлкә, территорияларҙы үҫтереү үҙенсәлектәре хаҡында белерһегеҙ, - тип билдәләне Радий Хәбиров һәм программа финалсыларының һорауҙарына ла яуап бирҙе, уларҙың ҡайһы берҙәре менән танышты.
Мәҫәлән, Рәсәйҙең Социаль фонд бүлексәһе хеҙмәткәре Илдар Вәлиев, Махсус хәрби операцияла хеҙмәт итеп ҡайтҡас, "Башҡортостан геройҙары" республика кадрҙар программаһының финалсыһы булды. Ул 2022 йылдың көҙөндә өлөшләтә мобилизация барышында фронтҡа алына. 2023 йылдың декабрендә ғаилә хәле буйынса демобилизациялана һәм элекке эш урынына ҡайта. Республикала "Башҡортостан геройҙары" кадрҙар проектының башланыуы тураһында иғлан ителгәс, Илдар Вәлиев документтарын йыйып тапшыра һәм финалға сыға. Яҡташыбыҙ үҙенең ҡарарын фронтта яңы тәжрибә туплауы менән аңлата, уны граждандар тормошонда ла ҡуллана. Атап әйткәндә, ул йәштәрҙе тәрбиәләү менән шөғөлләнергә, ирекмәндәргә ярҙам итергә һәм һөнәри эшмәкәрлегендә яңы һөҙөмтәләргә өлгәшергә ниәтләй.

"Киске Өфө" гәзите, №29, 25 - 31 июль 2025 йыл

КИРЕ СЫҒЫРҒА