Баш ҡаланың Затон биҫтәһендә башҡорт орнаменты стилендәге фасадтары булған яңы торлаҡ комплексы барлыҡҡа киләсәк. Халыҡтар Дуҫлығы проспектындағы йорттарҙы традицион башҡорт балаҫы аҫалары биҙәйәсәк.

Милли орнаменттар ҡулланыу идеяһы - заманса биналарға урындағы колорит биреү маҡсатында тормошҡа ашырыла, тинеләр төҙөүсе компанияла. "Проектта төбәктең традициялары һәм мәҙәни коды заманса ҡала киңлегенә үрелеп барыр һәм өлгө булыр тип көтәбеҙ", - тип аңлатма бирҙе "Самолет" девелоперы вәкиле.
Өфө архитектураһында орнамент күптән ҡулланыла. Мәҫәлән, Конгресс-холл фасады масштаблы башҡорт орнаменты менән биҙәлгән, ә эргәләге фонтан комплексы ҡурай сәскәләре рәүешендә эшләнгән. Өфө үҙәгендәге Hilton Garden Inn һәм Hampton by Hilton ҡунаҡханалары фасадтары ла башҡорт декорына хас орнаменттар һәм биҙәктәр менән биҙәлгән. Милли мотивтар менән рәссамдар ҙә илһамлана, һуңғы йылдарҙа уларҙың муралдары йыш ҡына бина стеналарында күренә. 2023 йылда рәссам Scheme күп ҡатлы йорттоң фасадында заманса интерпретацияла орнамент менән "ӨФӨ" 3D-мурал ижад итә. 2024 йылда Сергей Акрамов Карл Маркс урамында Башҡортостандың эндемик үҫемлектәренән флористик биҙәкле "Эндемик" муралын тәҡдим итә.
Торлаҡ комплексы Халыҡтар дуҫлығы проспектында урынлашасаҡ һәм гектарҙан ашыу майҙанды биләйәсәк. Торлаҡтан тыш, комплекс биләмәһендә мәктәп һәм балалар баҡсаһы төҙөләсәк. Шулай уҡ биш саҡрым оҙонлоҡтағы велосипед-йәйәүлеләр юлы һуҙыласаҡ - ул "Өфө муйынсағы" проектының дауамы буласаҡ. Ә Халыҡтар дуҫлығы проспекты аша компания ер өҫтө йәйәүлеләр үткәүеле төҙөйәсәк.
Шуны ла билдәләп үтергә кәрәк, һуңғы ваҡытта Затон биҫтәһе матурлана бара, бөгөн ул Өфөнөң иң динамик үҫешкән райондарының береһе. Власть уны комплекслы үҫтереү менән шөғөлләнә: юлдарҙы ремонтлай, иҫке торлаҡты һүтә. 2026 йылда бында үҙәктән велосипед юлы һуҙыласаҡ - был хаҡта яҙ көнө мэр Ратмир Мәүлиев һөйләне. Бынан тыш, Башинформ хәбәр иткәнсә, Сергей Михалев, Михаил Зайцев урамдары һәм Халыҡтар дуҫлығы проспекты сиктәрендә еңел атлетика манежы һәм олимпия резервы училищеһы менән ҙур спорт комплексын төҙөү планлаштырыла.

"Киске Өфө" гәзите, №32, 15 - 21 июль 2025 йыл

КИРЕ СЫҒЫРҒА