Был аҙнала Бөрөлә мәғариф буйынса республика август кәңәшмәһе үтте. Уның эшендә Башҡортостан Башлығы Радий Хәбиров, РФ Федерация Советының Фән, мәғариф һәм мәҙәниәт буйынса комитет рәйесе Лилиә Ғүмәрова, республиканың ҡала һәм райондары хакимиәттәре башлыҡтары, алдынғы педагогтар һәм мәғариф ветарандары ҡатнашты.

Август кәңәшмәһенең ҡала мәҙәниәт һарайында үткән пленар өлөшөндә Радий Хәбиров сығыш яһаны: "Хөрмәтле уҡытыусылар, лайыҡлы Ватан һаҡсылар тәрбиәләгәнегеҙ өсөн һеҙгә ихтирам белдерәм һәм рәхмәт һүҙҙәрен еткерәм. Бөгөн һеҙ белем биргән уҡыусыларығыҙ, ҡаһарманлыҡ күрһәтеп, алғы һыҙыҡта батырҙарса көрәшә", - тине һәм йәш быуынды әхлаҡи-патриотик тәрбиәләүгә ҙур өлөш индергәндәре өсөн республика педагогтары хеҙмәтенә оло баһа бирҙе.
Радий Хәбиров төбәктә белем биреүҙең бөтә кимәлдәренең дә - мәктәпкәсә белем биреүҙән алып юғары уҡыу йорттарына тиклем - әүҙем үҫешеүен, һуңғы алты йылда Башҡортостанда 33 меңгә яҡын урынға иҫәпләнгән 48 яңы мәктәп һәм 65 балалар баҡсаһы асылыуын, федераль программа буйынса 11 миллиард һумдан ашыу суммаға 181 мәктәп ремонтланыуын билдәләп үтте. Республика Башлығы әйтеүенсә, быйыл федераль программа сиктәрендә 35 мәктәп, 2 балалар баҡсаһы, 3 колледж яңыртылған. Киләһе йылда тағы 41 мәктәп бинаһы тәртипкә килтереләсәк. Бының өсөн 3 миллиард һумдан ашыу аҡса бүленә.
Республикабыҙҙа урта һөнәри белем биреүҙең матди-техник базаһы әүҙем яңыртыла. Быға колледждарҙың "Профессионалитет" проектында ҡатнашыуы булышлыҡ итә. Уның сиктәрендә республикаға 2 миллиард һумдан ашыу федераль субсидия йәлеп ителгән. Колледждарҙы капиталь ремонтлау төбәк программаһы сиктәрендә лә дауам итә. Өс йыл эсендә был маҡсатҡа республика бюджетынан 1,2 миллиард һум аҡса бүленгән, 38 бина ремонтланған.
Юғары белем биреү инфраструктураһын үҫтереү - алда торған тағы бер бурыс, тип белдерҙе Радий Хәбиров. Фән һәм технологиялар, аграр, нефть техник һәм медицина университеттарының "Өҫтөнлөк 2030" стратегик федераль программаға инеүе - киләсәккә етди инвестициялар ул. Вуз-ара студенттар кампусы төҙөлөшө әүҙем бара. Унда алдынғы ҡорамалдар менән йыһазландырылған лабораториялар булған уникаль ғилми кластер формалаша.
Төбәк етәксеһе шулай уҡ педагогик хеҙмәткәрҙәргә адреслы ярҙам сараларын билдәләп үтте. Биш йыл эсендә 525 йәш уҡытыусы 690 мең һумлыҡ грантҡа эйә булған. Ә 2025 йылдың 1 сентябренән ауыл мәктәптәренең 50 директоры ошондай дәртләндереү сараһына хоҡуҡ ала. 2024 йылда тәүге тапҡыр 75 иң яҡшы балалар баҡсаһы педагогы 575 мең һум күләмендә грант алған. Быйыл тағы ла 50 тәрбиәсе ошондай ярҙам сараһына лайыҡ булды.
Яңы уҡыу йылында мәктәптәргә 500 меңдән ашыу уҡыусы, шул иҫәптән 45 мең беренсе класс уҡыусыһы бара. Тәүге тапҡыр парта артына ултырыусыларҙың 1,2 меңдән ашыуы - Махсус хәрби операцияла ҡатнашҡан яугирҙарҙың балалары. Ошоға бәйле Республика Башлығы район-ҡала хакимиәттәре башлыҡтарына мөрәжәғәт итеп: "Уларҙы мәктәпкә әҙерләүҙе шәхсән контролдә тотоуығыҙҙы һәм тантаналы линейкаға оҙатыуҙы ойоштороуҙы һорайым", - тине.
Яҡынлашып килгән уҡыу йылы менән республика уҡытыусыларын РФ Федерация Советының Фән, мәғариф һәм мәҙәниәт буйынса комитеты рәйесе Лилиә Ғүмәрова ҡотланы. Үҙенең сығышында ул, Башҡортостан бөтә профилле федераль проекттарҙа әүҙем ҡатнаша, был тармаҡтың конкурентлыҡ һәләтен арттырыуға булышлыҡ итә, тип билдәләп үтте.

"Киске Өфө" гәзите, №34, 29 август – 4 сентябрь 2025 йыл

КИРЕ СЫҒЫРҒА