Армия мәҙәниәте көндәре сиктәрендә Өфөгә Рәсәй художество академияһы директоры, билдәле скульптор Зураб Церетелиҙың ейәне Василий Церетели килде. Ул республикаға икенсе тапҡыр килеүен, бында үткәрелгән сараларҙың масштабына хайран ҡалыуын белдерҙе.

Ҡунаҡ Өфөнө архитектура һәм художество күҙлегенән юғары баһаланы, уны "заманса матур ҡала" тип атаны. Василий Церетели ҙур профессионаллек һәм зауыҡ менән биҙәлгән музейҙарҙы һәм иҫ киткес грандиоз һәйкәлдәрҙе билдәләне. Улар араһында генерал Шайморатов һәйкәле айырым урын алып тора, тирә-яҡҡа йәм бирә, тип өҫтәне.
Василий Церетели, ил өсөн ауыр мәлдә сәнғәттең роле ҙур, тине. Уның һүҙҙәренсә, сәнғәт әҫәрҙәре, әҙәбиәт, скульптура һәм картиналар халыҡты һәм милләтте берләштерә. Сталиндың Бөйөк Ватан һуғышы йылдарында Рәсәй художество академияһын тергеҙеүе быны асыҡ дәлилләүен һыҙыҡ өҫтөнә алды.
Алғы һыҙыҡтағы рәссамдар, яугирҙар менән йәнәш, ваҡиғаларҙы мәңгеләштерә, эштәр ижад итә һәм яҙа. Ә һуңынан монументтар һәм кинофильмдар булдырыла, улар менән илебеҙ ғорурлана һәм ошо әҫәрҙәр йоғонтоһо аҫтында тотош быуындар үҫә, тип белдерҙе. Шулай уҡ, академия етәксеһе фекеренсә, тап Армия мәҙәниәте көндәре һәм "Үлемһеҙ полк" кеүек саралар патриотик тәрбиәнең мөһим саралары булып тора.
"Бала саҡтан уҡ Ватанға, мәктәпкә, балалар баҡсаһына, ихатаға, ғаиләгә һөйөү тәрбиәләү зарур. Өлкәндәргә һәм тыуған илде яҡлаусыларға ихтирам тәрбиәләү зарур. Тыуған илгә һөйөү шулай тәрбиәләнә. Тарихи ваҡиғаларға, Бөйөк Ватан һуғышына, Махсус хәрби операцияға, шулай уҡ заман темаларына арналған ижади конкурстар ҙа бындай тәрбиәнең һөҙөмтәле ысулы", - тип иҫәпләй Церетели.

"Киске Өфө" гәзите, №35, 5 – 11 сентябрь 2025 йыл

КИРЕ СЫҒЫРҒА