Сибай ҡыҙы Зарина Исламова Таиландта тай боксы буйынса турнирҙа Sanehjan менән алышта ышаныслы еңеү яуланы. Хәҙер ул халыҡ-ара титулға эйә булды. "Ярыштар легендар Раджадемнерн стадионында үтте. Был Таиландтың тай боксы (муай-тай) ҡағиҙәләре буйынса алыштар ойошторолған стадиондарҙың береһе, Раджадемнерн стадионы чемпионы титулы был спорт төрөндә абруйлы булып һанала.

23 йәшлек Зарина алышҡа башҡорт бүреген һәм өләсәһенең үҙ ҡулдары менән яһаған түшелдеректе тағып сыҡҡан. Шул рәүешле Зарина башҡорт милләтен, милли кейемен донъяға таныта. "Был образ минең өсөн көс һәм наҙлылыҡты, ышаныс һәм ихтыяр көсөн сағылдыра. Был - традицияларҙы бутау түгел, минең күңелемдә йәшәүсе ир-егет һәм ҡатын-ҡыҙ башланғыстарының гармонияһын күрһәтеү. Бала саҡтан алып ир-егеттәр донъяһына, спортҡа, физик көскә күберәк тартылғанмын. Әммә минең күңелемдә шулай уҡ нәфислек, йомшаҡлыҡ, матурлыҡ та бар. Был образда миңә иң төп нәмә - өләсәйем эшләгән түшелдерек. Ул уны ҡот өсөн һәм бирнә итеп үҙ ҡулдары менән яһаған. Уны кейгәндә мин өләсәйемдең ҡулдарының йылыһын, көсөн, тыуған ерем менән бәйләнеште тоям. Был минең өсөн биҙәк кенә түгел - хәтер, тамырҙарымды онотмау. Башҡортостандан булыуыма мин ныҡ ғорурланам һәм быны бөтә донъяға белдергем килә: беҙҙең үҙ традицияларыбыҙ, милли кейемдәребеҙ, мәҙәниәтебеҙ бар, беҙ уларҙы хөрмәт итәбеҙ һәм ғорурланабыҙ".
Зарина Исламова бәләкәй сағынан уҡ Сибайҙың "Ҡара аждаһа" клубында көнсығыш һуғыш төрҙәре менән шөғөлләнә һәм баштан үҙен маҡсатҡа ынтылыусан спортсы итеп таныта. Ул кикбоксинг һәм тай боксы буйынса Башҡортостан, Рәсәй чемпионы, төбәк-ара ярыштарҙа бик күп миҙалдар яулауы менән билдәле. Иң ҙур ҡаҙаныштарының береһе - 2024 йылда Грецияла уҙған U23 донъя чемпионатында алтын миҙал яулауы. Бына әле Таиландтың легендар стадионында көслө дәғүәселәрен еңеп, халыҡ-ара титулға өлгәште. Бангкоктағы еңеүе лә уның ныҡышмал хеҙмәте емеше. Сибай йәштәре уның уңыштарын күҙәтеп бара һәм һәр яҡлап уға оҡшарға тырыша.
Социаль селтәрҙәге сәхифәһендә Зарина тренеры Руслан Кривушаға, командаһына, партнерҙарына, турнирҙы ойоштороусыларға, "Ҡара аждаһа" клубы, Сибай балалар һәм үҫмерҙәр спорт мәктәбе етәкселегенә, тренеры Александр Гавриловҡа рәхмәт белдерә һәм: "Бангкоктың иң шәп стадиондары рингына күтәрелеү минең өсөн оло мәртәбә. Һәр алышым теләһә ҡайһы дәғүәсегә ҡаршы тороуға әҙерлек мәктәбе. Тыуған ҡаламды, республикамды, илемде халыҡ-ара аренала танытыуыма ифрат шатмын", -тип яҙа.

Гөлдәр ҠАҘЫЕВА.
"Киске Өфө" гәзите, №35, 5 – 11 сентябрь 2025 йыл

КИРЕ СЫҒЫРҒА