Сибай ҡалаһының Рамазан Өмөтбаев исемендәге Башҡорт лицейы яңы уҡыу йылына әҙерләнеп, мәктәп ҡапҡаһын башҡорт телендәге мәғлүмәти стендтар менән биҙәгән.

"Бөйөк шәхестәрҙең фекерҙәренән тыш, башҡорт теле ҡағиҙәләре лә уҡыусылар өсөн файҙалы буласаҡ, - ти лицей директоры Дилә Фәтҡуллина. - Был эште мәктәп коллективы һәм атай-әсәйҙәр менән берлектә тормошҡа ашырҙыҡ. Эстафетаны Башҡортостан Республикаһының милли һәм полилингваль мәктәптәренә тапшырабыҙ".
Телһөйәр, илһөйәр балалар тәрбиәләү - белем усағының төп маҡсаттарының береһе. Ә был маҡсатты тормошҡа ашырыуға китап йә уҡытыусы ғына түгел, ә барлыҡ саралар, шулай уҡ Сибай лицейының фиҙакәр уҡытыусылары уйлап тапҡан ошондай стедтар ҙа булышлыҡ итә икәненә бер ниндәй ҙә шик юҡ. Афариндар!

"Киске Өфө" гәзите, №36, 12 – 18 сентябрь 2025 йыл

КИРЕ СЫҒЫРҒА