Өфөлә Салауат Юлаев һәйкәлен реконструкциялауға әҙерлекте тамамланылар.

30 июндә федераль әһәмиәттәге мәҙәни мираҫ объектын, милли батырыбыҙ, республикабыҙҙың төп символы Салауат Юлаев һәйкәлен реставрациялау башланғайны. Әлеге ваҡытта әҙерлек эштәре тамамланған: һәйкәлдең тирә-яғы ҡойма менән уратып алынған, ваҡытылыса инженер селтәрҙәре, электр уты үткәрелгән, видеокүҙәтеү ҡуйылған. Шулай уҡ һәйкәлде нығытыу өсөн тимер конструкциялар әҙерләнгән.
Ошо көндәрҙә республика хөкүмәте премьер-министры урынбаҫары Рөстәм Ғәзизов реконструкция урынында эш барышына арналған кәңәшмә үткәрҙе. "Барлыҡ эштәр юл картаһына ярашлы, график буйынса тәғәйен ваҡытта башҡарыла. Сентябрҙә ҡурғандың ваҡытлыса ҡоймаһын һүтеп, ер эштәренә тотонорға ниәтләйбеҙ. Шулай уҡ брусчатка һәм гранит баҫҡыстар һүтеләсәк. Объектты мин үҙем шәхсән айырым контролемдә тотам. Эш барышының төп этаптары һәм уларҙың һөҙөмтәләре тураһында даими хәбәр итеп торасаҡмын", - тип яҙҙы Рөстәм Ғәзизов социаль селтәрҙәге сәхифәһендә.
Башҡортостандың мәҙәни мираҫ объекттарын дәүләт һаҡлауы идаралығы начальнигы Салауат Ҡолбахтин, Салауат Юлаев һәйкәлен реставрациялау мәсьәләһенә бәйле халыҡтың хәүефләнеүе бушҡа, тип белдерә. Уның һүҙҙәренсә, һәйкәлде яңыртыу эштәре мәҙәни мираҫ объекттарын һаҡлау буйынса федераль законға ярашлы алып барыла. Был процеста бер ниндәй ҙә үҙгәрештәр индерелергә тейеш түгел.
"Салауат Юлаев һәйкәле урынына кире ҡайтамы?" тигән һорауға яуап биреп, һис шикләнмәйенсә: "Эйе", - тип әйтәм! Реставрация эштәрен үткәреү сиктәрендә федераль ҡануниәт талаптарын үтәмәгән өсөн яуаплы кешеләр енәйәт яуаплылығына тиклем тарттырылырға мөмкин", - тип һыҙыҡ өҫтөнә ала Ҡолбахтин.

Гөлфиә АКУЛОВА.
"Киске Өфө" гәзите, №37, 19 – 25 сентябрь 2025 йыл

КИРЕ СЫҒЫРҒА