Башҡортостан Башлығы Радий Хәбиров 2024 йылда МХО биләмәһендә батырҙарса һәләк булған Рәсәй Геройы Илдар Суфияровтың кәүҙәһе табылған, тип хәбәр иткәйне һәм Хөкүмәттең был аҙналағы оператив кәңәшмәһен һәләк булған яугирҙарҙың иҫтәлегенә бер минут тынлыҡтан башлағайны.

"Миңә Суфияров Илдар Филорет улының кәүҙәһен табыуҙары хаҡында хәбәр иттеләр. Уның янында тағы өс яугир. Кәүҙәһен Ростовҡа экспертизаға килтергәндәр. Иртәнсәк Суфияровтың әсәһенә һәм ҡатынына шылтыраттым. Ауыр бурыс үтәргә тура килә. Илдар Филорет улы - ғәжәйеп кеше. Ҡыҙғанысҡа ҡаршы, үҙен яҡындан белмәй инем", - тине Радий Хәбиров.
Һәм бына 18 сентябрҙә Өфөлә "Башҡортостан" дәүләт концерт залына һуңғы минутынаса Тыуған иленең сиген һаҡлап, алғы һыҙыҡта һәләк булған Рәсәй Геройы Илдар Суфияровты һуңға юлға оҙатырға йыйылдылар. Матәм сараһына ҡаһарман яугирҙы белгән һәм уны хөрмәтләп иҫкә алырға теләгән һәр кем бәхилләшергә килде.
Өлкән лейтенант, "Башҡортостан" мотоуҡсылар полкының Даян Мурзин исемендәге батальон взводы командиры Илдар Суфияровтың батырлығы был көндәрҙә һәм кемдең телендә булды. Тормошобоҙҙа бындай батырлыҡтарға ла урын бар шул әле. Яугир 2024 йылдың апрелендә МХО биләмәһендә һәләк булды. Офицер һан яғынан күберәк булған украин боевиктары менән алыша. Хәрби хәлдең ҡатмарлы булыуына ҡарамаҫтан, Суфияров күҙәтеү пунктындағы позицияһын ташлап китмәй, дошман яҡынлаша башлағас, үҙен һәм ВСУ-ның өс һалдатын граната менән шартлата...
Уҙған йылдың октябрендә Рәсәй Президенты Владимир Путин Указы менән Илдар Суфияровҡа үлгәндән һуң Рәсәй Геройы исеме бирелде. Был исемде юллауға күп көс һалған республика Башлығы Радий Хәбиров Рәсәй Президенты Владимир Путинға һәм илдең оборона министры Андрей Белоусовҡа оло рәхмәт белдерҙе.
Яҡташыбыҙ Илдар Суфияров баш ҡаланың Көньяҡ зыяратында ерләнде.

"Киске Өфө" гәзите, №37, 19 – 25 сентябрь 2025 йыл

КИРЕ СЫҒЫРҒА