Үткән шәмбелә Башҡортостан Башлығы Радий Хәбиров Өфө ҡалаһының "Кузнецов затоны" биҫтәһендә һәм Өфө районының Шмидт ауылында мәктәптәр төҙөү барышы менән танышты.

"Кузнецов затоны"ндағы 2200 урынлыҡ Волга буйы федераль округындағы иң ҙур мәктәп төҙөлөшө тамамланыу өҫтөндә. Дөйөм майҙаны 34 мең квадрат метрҙан ашыу яңы белем биреү учреждениеһының дүрт спорт һәм тамаша залы, махсуслаштырылған дизайн, фото һәм кино төшөрөү, театр студияһы, нәшриәт үҙәге, робот техникаһы кабинеттары бар. Мәктәп биләмәһендә мини-футбол, баскетбол, теннис өсөн спорт майҙансыҡтары, шулай уҡ йүгереү юлдары һәм тренажерҙар урынлаштырыла. "Уҡыусылар яңы мәктәптә өсөнсө сиректән, яңы йыл каникулдарынан һуң, уҡый башлар, тип планлаштырабыҙ", - тип билдәләне Радий Хәбиров. Шмидт ауылында 160 тәрбиәләнеүсегә иҫәпләнгән балалар баҡсаһы менән берләштерелгән 640 урынлыҡ заманса белем биреү үҙәге төҙөлөшө дауам итә. Проект буйынса мәктәп һәм мәктәпкәсә учреждение айырым биналарҙа урынлашҡан. Бында технологик һәм инженерлыҡ белемгә айырым иғтибар биреләсәк. Учреждение Өфөлә тыуып үҫкән, хәрби бурысын үтәгәндә һәләк булған өлкән лейтенант Илдар Суфияровтың исемен йөрөтәсәк. "Шмидт мәктәбен күптән көтәләр. Беҙ уны, республикалағы башҡа ҡайһы бер белем биреү учреждениелары кеүек үк, концессия килешеүе буйынса төҙөйбөҙ. Һәм, әлбиттә, уның Рәсәй Геройы исемен йөрөтөүе бик мөһим", - тип һыҙыҡ өҫтөнә алды Башҡортостан Башлығы.

"Киске Өфө" гәзите, №38, 26 сентябрь – 2 октябрь 2025 йыл

КИРЕ СЫҒЫРҒА