Бөрйән районында халыҡ менән осрашыу барышында алты бала әсәһе мөрәжәғәт иткәйне. Ул балаларҙы ҡарауҙың бөтә йылдары ла пенсияның страховкалау стажына индерелмәүенә, шуға күрә иртәрәк хаҡлы ялға сыға алмауына зарланды. Бөтә документтарҙы өйрәнергә һәм, нигеҙ булғанда, законға үҙгәрештәр индереүҙе башларға вәғәҙә бирҙем.

Асыҡланыуынса, "Страховка пенсиялары тураһында" Федераль закондың 12-се статьяһында страховка стажына ата-әсәләрҙең береһенә һәр баланы йәш ярымға тиклем, әммә дөйөм алғанда алты йылдан артыҡ булмаған ҡарау осоро инә. Был страховка стажына дүрт баланы ҡарау ғына инәсәк тигәнде аңлата (4+1,5=6). Бишенсе һәм артабанғы балаларҙы ҡарау осоро страховка стажына инмәй. Әлеге закон нигеҙендә биш балалы әсә, 15 йыл страховка стажы булғанда, 50 йәштән хаҡлы ялға сығырға хоҡуҡлы. Миңә мөрәжәғәт итеүсе әсәнең бишенсе һәм алтынсы балаһын ҡарауы иҫәпкә алынмағанлыҡтан страховка стажы 15 йылға етмәгән. Һөҙөмтәлә ул иртәрәк хаҡлы ялға сыға алмай.
Рәсәй Федерацияһының хеҙмәт һәм социаль яҡлау министрына страховка стажына бөтә балаларҙы ла ҡарау осорон иҫәпкә алырға кәрәклеген аңлатып, законға үҙгәрештәр индерергә кәрәклеген тәҡдим иттем. Министрҙан бындай үҙгәрештәр менән риза булыуын, көнүҙәклеге менән килешеүе тураһында яуап алдым.
Тиҙ арала РФ Дәүләт Думаһына закон проекты әҙерләнде һәм уны беренсе уҡыуҙа ҡабул иттек. Законды тормошҡа ашырыу өсөн йылына 12 миллиард һум самаһы аҡса талап ителәсәк. Көҙгөһөн законды икенсе һәм өсөнсө уҡыуҙа ҡабул итәсәкбеҙ. Бөрйән районынан әсәнең мөрәжәғәте Федераль законға үҙгәреш индереүгә булышлыҡ итте. Был сара дүрт һәм унан да күберәк бала тәрбиәләүсе меңәрләгән ата-әсәгә файҙа килтерәсәк.

Зариф БАЙҒУСҠАРОВ,
Рәсәй Дәүләт Думаһы депутаты.
"Киске Өфө" гәзите, №38, 26 сентябрь – 2 октябрь 2025 йыл

КИРЕ СЫҒЫРҒА