Өфө дәүләт нефть техник университеты студенты Вадим Харисов Төркмәнстанда Химия буйынса халыҡ-ара олимпиадала еңеүсе булды. Ул барлыҡ ҡатнашыусылар араһында иң юғары балл йыйып, алтын миҙал яуланы, тип хәбәр иттеләр университеттың матбуғат хеҙмәтенән.

Рәсәй студенттары бөтәһе 25 миҙал алды, шуларҙың 13-ө - алтын. Беҙҙең илдән М.В. Ломоносов исемендәге Мәскәү дәүләт университеты, Рәсәй халыҡтар дуҫлығы университеты, Ҡаҙан (Волга буйы) федераль университеты, Новосибирск дәүләт университеты, МФТИ, Өфө дәүләт нефть техник университеты һәм Б. Б. Городовиков исемендәге Ҡалмыҡ дәүләт университеты студенттары сығыш яһаны. Ярыштар төркмән, рус һәм инглиз телдәрендә ике категорияла (химия һәм ике йүнәлештәр өсөн) ойошторолдо.
Олимпиада еңеүселәрен вице-премьер Дмитрий Чернышенко, фән һәм юғары белем министры Валерий Фальков ҡотланы. "13 алтын миҙал - оло еңеү. Был уңыш - Рәсәйҙең алдынғы университеттары профессорҙары һәм ғилми мәктәптәренең таланты, тырышлығы һәм һоҡланғыс эше һөҙөмтәһе. Беҙ еңеүселәр һәм уларҙың остаздары менән ғорурланабыҙ! Был ҡаҙаныштар менән генә туҡтап ҡалмағыҙ һәм яңы үрҙәр яулағыҙ!" - тине Дмитрий Чернышенко. Олимпиадала Азербайжан, Әрмәнстан, Белоруссия, Бөйөк Британия, Иран, Италия, Ҡаҙағстан, Ҡытай, Рәсәй, Үзбәкстан һәм Тажикстандың 24 юғары уҡыу йортонан бөтәһе 100 студент, шулай уҡ Төркмәнстандың 23 университетынан 150-нән ашыу студент ҡатнашты.

Ләйсән ЗАКИРОВА.
"Киске Өфө" гәзите, №42, 24 - 30 октябрь 2025 йыл

КИРЕ СЫҒЫРҒА