"Күп ҡатлы йортта йәшәйем. Күрше беҙҙең ҡатҡа камера ҡуйҙы. Фатирымдың ишеге лә унда эләгә. Кем килгәне, ишек төбөндә нимә тураһында һөйләшкәнбеҙ - барыһы ла уға мәғлүм. Был миңә оҡшамай. Нимә эшләргә? Айгөл С.
Сибай ҡалаһы".

- Яуап рәүешендә миҫалға суд ҡарарын килтерәм. Был мәғлүмәт барыһы өсөн дә фәһемле булыр.
Волгоград ҡалаһында күп фатирлы йортта йәшәүсе Сергей 2024 йылдың декабрендә ишеге өҫтөндә тауыш яҙҙырған видеокамера ҡуя. Был күршеһе Артурға оҡшамай һәм ул судҡа мөрәжәғәт итә. "Сергей подъездағы видеокамераһын алып ташлаһын. Ҡайһы ваҡытта өйҙә кеше булмауын, кем килгәнен, нимә тураһында һөйләшкәнемде күҙәтә ала, тимәк, тормошома ҡыҫыла", - тип дәғүә белдерә.
Суд, эште тикшергәндән һуң, Сергей урынлаштырған видеокамера, ысынлап та, Артурҙың шәхси тормошон күҙәтеүен, уның фатирына кемдәр килгәнен-сыҡҡанын, тауыштарҙы теркәп барыуын асыҡлай. Закон буйынса, күп фатирлы йорттоң дөйөм ҡулланыуҙа булған майҙанына шәхси видеоаппаратура ҡуйыу тыйылмаған, әммә был бөтә торлаҡ хужаларының ризалығы менән генә эшләнергә тейеш. Сергейҙың күршеләре видеокамера ҡуйыуға ризалыҡ бирмәгән.
Район суды Сергейға видеокамераны һүтергә ҡуша. Ул суд менән килешмәй һәм апелляция бирә. Әммә Волгоград өлкә суды был ҡарарҙы законлы һәм нигеҙле тип таный. Сергей камераны алып ташларға мәжбүр була.

Зариф БАЙҒУСҠАРОВ,
Рәсәй Дәүләт Думаһы депутаты, Башҡортостандың атҡаҙанған юрисы.
"Киске Өфө" гәзите, №44, 7 - 13 ноябрь 2025 йыл

КИРЕ СЫҒЫРҒА