Академик Эльза Хөснөтдинованың исеме Башҡортостанда ғына түгел, унан ситтә лә фән донъяһында киң билдәле. Башҡортостан һәм Рәсәй Фәндәр академияһы ағзаһы, Рәсәй Фәндәр академияһы Өфө федераль тикшеренеү үҙәгенең Биохимия һәм генетика институты ғилми етәксеһе эшмәкәрлеге күптән инде ғалимдарҙың яңы быуыны өсөн ориентир булып тора.

ЦУР һәм Башҡортостан Юлдаш телевидениеһының "Ғорурланырға сәбәп" проектын ойоштороусылар һөйләүенсә, донъя кимәлендә билдәле тикшеренеүсе ғалимә күп йылдар дауамында Волга-Урал төбәге халыҡтарының генофондын өйрәнеү буйынса күләмле эштәрҙе уңышлы етәкләй. Был фундаменталь тикшеренеүҙәр ҙур практик әһәмиәткә эйә: улар нәҫелдән килгән күп факторлы ауырыуҙарҙың сәбәптәрен асыҡларға мөмкинлек бирә. Был иһә уларҙы иртә иҫкәртеү һәм диагностикалауҙың асҡысы булып тора.
2025 йылда Эльза Хөснөтдинованың ғилми эшмәкәрлеге Өфөлә Евразия НОЦ структураһында Геном үҙәге асылыу менән яңы ҡеүәтле импульс алды. Бында уның етәкселегендә хәҙерге замандың иң перспективалы йүнәлештәренең береһе - ҙур генетик мәғлүмәттәр массивы менән эшләү һәм профилле тикшеренеүҙәргә мәғлүмәт технологияларын индереү үҫешә. Эҙләнеүҙәр ғәйәт ҙур мәғлүмәтте эшкәртергә, элек мөмкин булмаҫтай күренгән асыштар яһарға мөмкинлек бирә. "Беҙҙең һөҙөмтәләр, республика генетиктарының тикшеренеүҙәре төрлө ауырыуҙарға сыҙамлы яңы үҫемлек сорттарын һәм хайуан тоҡомдарын булдырыуға булышлыҡ итә", - тип билдәләй ғалимә.
Эльза Хөснөтдинованың хеҙмәттәре юғары дәүләт кимәлендә баһаланды. 2025 йылдың мартында төбәк Башлығы Радий Хәбиров Указы менән ул "Башҡортостан Республикаһы алдындағы хеҙмәттәре өсөн" ордены менән бүләкләнде.

"Киске Өфө" гәзите, №45, 14 - 20 ноябрь 2025 йыл

КИРЕ СЫҒЫРҒА