Күптәр өсөн телевидение - йәшәү рәүешенең айырылғыһыҙ бер өлөшө, йәмәғәтселек аңын формалаштырыу буйынса иң һөҙөмтәле төп мәғлүмәт сығанаҡтарының береһе. Һүҙебеҙ "Бөтә Өфө" ("Вся Уфа") ҡала телеканалы тураһында.

Телеканал 1999 йылда алып өфөләр менән бергә. Уны Өфөлә генә түгел, шулай уҡ Ишембайҙа, Нефтекамала, Октябрьскийҙа, Салауатта, Стәрлетамаҡта һәм Башҡортостандың башҡа ҙур ҡалаларында ла ҡарай алалар. 2019 йылдың 5 сентябренән тапшырыуҙар HD форматында эфирға сыға. "Бөтә Өфө" һөйләй һәм күрһәтә", "Аҙна йомғаҡтары" мәғлүмәт-аналитика программалары ҡала тормошон тулыһынса һәм һәр яҡлап яҡтырта. "Өфөнө яратыуҙың 450 сәбәбе" проекты - республика баш ҡалаһының иң матур һәм иҫтәлекле, шулай уҡ уникаль урындары, арт-объекттары һәм билдәле шәхестәре тураһында һөйләй. "Мөхәббәтең сиге юҡ" тапшырыуы Өфөлә яратҡан кешеһен тапҡан һәм ныҡлы ғаиләлә ҡорған төрлө милләт кешеләренә бағышлана. Ә "Өфө хәбәрҙар" программаһында эксперттар сәйәсәт, фән, сәнғәт, тарих өлкәһенә ҡағылышлы мәсьәләләр буйынса фекер алыша. Әлбиттә, ваҡытты күңелле үткәреү өсөн дә урын бар "Бөтә Өфө"лә. "Баш ҡала" күңел асыу шоуы, йәш башҡарыусыларҙың "Өфө хиты", автомобилселәр өсөн "Өфө тәгәрмәстәрҙә!", диндәр тарихы тураһында "Изге хәҡиҡәт" тапшырыуҙары телевизор ҡараусылар араһында бик яратып ҡабул ителә. 2004 йылда Өфө ҡала округы хакимиәте һәм "Бөтә Өфө" телеканалы "Беҙҙең заман геройы" телевизион йәмәғәт премияһын булдырҙы. Ул йәмғиәт мәнфәғәтен үҙенекенән өҫтөн ҡуйып изгелек ҡылған, ҡаһарманлыҡ күрһәткән кешеләргә тапшырыла. Каналда "Бөтә Өфө" медиамәктәбе эшләй. Ул телевизор ҡараусыға экрандың икенсе яғында үҙен һынап ҡарарға, ораторлыҡ оҫталығын үҙләштерергә, үҙенә ышанысын арттырырға һәм яңы һөнәр үҙләштерергә мөмкинлек бирә.
"Өфө һәм Башҡортостан халҡы өсөн ышаныслы көнүҙәк мәғлүмәт сығанағы булыу - беҙҙең төп тәғәйенләнеш. "Бөтә Өфө" Медиадом" муниципаль бюджет учреждениеһы - киң мәғлүмәт сараһы ғына түгел, ул ҡалабыҙ тормошоноң ҙур бер өлөшө. Мәғлүмәт порталдары һәм ҡағыҙ баҫмаларыбыҙ 100 меңдән ашыу кешене берләштергән аудиторияны үҙ эсенә ала. Иҡтисад, һаулыҡ һаҡлау, мәғариф, торлаҡ-коммуналь хужалығы, тарих, мәҙәниәт кеүек төп темалар даими яҡтыртыла", - ти ойошма директоры Юлия Йомагуена.
Әйткәндәй, "Бөтә Өфө" Медиадом" муниципаль бюджет учреждениеһы составына "Бөтә Өфө" телеканалынан тыш, "Киске Өфө", "Вечерняя Уфа", "Уфимские ведомости" гәзиттәре һәм "Уфа" журналы ла инә. Беҙ - бергә!

Рәзил ШӘМСЕТДИНОВ әҙерләне.
"Киске Өфө" гәзите, №47, 28 ноябрь – 4 декабрь 2025 йыл

КИРЕ СЫҒЫРҒА