Өфөлә икенсе тапҡыр "Йәш шайморатовсылар балы" уҙҙы. Башҡортостан Башлығы Радий Хәбиров республиканың 23 районында һәм 5 ҡалаһында асылған 34 "шайморатовсылар класы"ның 200-ҙән ашыу уҡыусыһын сәләмләне һәм ҡотланы.

Башҡортостан Башлығы Радий Хәбиров балдың Ватан Геройҙарын хөрмәтләп иҫкә алған көндө үтеүен билдәләне.
"Генерал Шайморатовтың яҙмышы һоҡланғыс. Башҡортостан, республикабыҙ өсөн ғорурлана алырҙай геройҙарыбыҙ булыуы ҙур бәхет. Тап ошо маҡсат менән беҙ үҙ ваҡытында "йәш шайморатовсылар" кластарын астыҡ. Улар хәрби тарихты өйрәнергә, республикабыҙҙың һәм илебеҙҙең ысын патриоттары булырға теләгән балаларҙы берләштерә. Йәш шайморатовсы булыу - ул айырым яуаплылыҡ. Уның исеме ғүмерегеҙ буйына һеҙҙе оҙатып барыр. Яҡшы уҡырға, яңы белемгә ынтылырға, спорт менән шөғөлләнергә, әлбиттә, патриот булырға кәрәк. Был көн һеҙҙең хәтерегеҙҙә, ата-әсәйегеҙҙең, уҡытыусыларығыҙҙың хәтерендә ҡалыр тип ышанам. Барығыҙға ла уңыштар, тыныслыҡ, именлек һәм тыуған Башҡортостаныбыҙҙың сәскә атыуын теләйем", - тине Радий Хәбиров.
Ул шулай уҡ 11 уҡыусыға "Йәш шайморатовсы" почет билдәләрен тапшырҙы. Йәш шайморатовсылар композитор Урал Иҙелбаев көйөнә башҡорт вальсын һәм Рим Хәсәновтың "Ҡышҡы романс" көйөнә вальс бейене.

"Киске Өфө" гәзите, №49, 12 - 18 декабрь 2025 йыл

КИРЕ СЫҒЫРҒА