"Бәйләнештә" биттәрендә йыш ҡына кескәйҙәрҙе балалар баҡсаһына йөрөтә башлаһаҡ, русса һөйләшә алмаясаҡ, сөнки өйҙә туған телдә аралашабыҙ, тип борсолоп яҙыусы кешеләргә өндәшкем килә: афариндар, өйөгөҙҙә әсә телендә һөйләшеүегеҙҙе дауам итегеҙ һәм һис борсолмағыҙ, балағыҙ баҡсаға бармаҫ борон уҡ барыбер русса белә, сөнки Үҙәк телевидениенан йәнһүрәттәр ҡарай, йырҙар тыңлай, ә был уларға бик яҡшы "дәрес" - тиҙ генә отоп та алалар. Баланың мөхитен тик бер төрлө телмәр менән генә сикләү мөмкин дә түгел, күберәк тел белгән һайын, уның зиһене, хәтере үҫешә. Кемдәрҙер 3-4 йәшлек балаһына ҡытай, инглиз телдәрен өйрәтеп маташа. Был да һәйбәт, тик туған телен генә онотоп китмәһендәр.

Ә бының өсөн өйҙә мотлаҡ туған телдә нәшер ителеүсе гәзит-журналдар булырға тейеш, тип инанғанмын, сөнки өлкән ейәнемде шулай тәрбиәләнек. Ул әле лә миңә таҙа башҡорт телендә "Киске Өфө" гәзитен ҡысҡырып уҡый. Икенсе яҡтан, мин уны бер аҙға булһа ла смартфон-ноутбугынан ял итһен өсөн дә шулай ҡушам, сөнки таныш күҙ табибы һуңғы ваҡыт күреү һәләтенең насарланыуына зарланып килеүсе үҫмерҙәр һәм йәштәрҙе күп ҡабул итеүе хаҡында һөйләгәйне.
Үҙем дә ялыҡтым был телефон менән интернеттан. Ысынлап та, иртәнсәк тороуға, күҙҙәр ҡыҙарып, сүп төшкәндәй ышҡылып йөҙәтә. Етмәһә, интернет йыш һүнеп йә оҙаҡ көйләнеп тора башланы. Ә инде бөтәһенән дә бигерәк мине үҙебеҙҙең туған мөхит хәл-әхүәле, яңылыҡтар һәм башҡа хәбәрҙәр ныҡ ҡыҙыҡһындыра. "Киске Өфө"нө һайлауым да тикмәнән түгел, унда республика, шулай уҡ баш ҡалабыҙ Өфө хәбәрҙәре тулы һәм уҡымлы итеп бирелә. Гәзитебеҙҙең "Тарихнамә", "Заман башҡорто", "Ҡомар", "Балаңа укы!", шулай уҡ башҡа рубрикалары ла күңелемә ятышлы һәм яратып уҡыйым. Әйткәндәй, күптән түгел киләһе йылға "Киске Өфө" гәзитен яҙҙырып, әхирәтемде лә ифрат ҡыуандырҙым әле. Иң шәп бүләк тә икән ул "Киске "Өфө"!

Мәҙинә ШӘЙӘХМӘТОВА,
педагогия хеҙмәте ветераны.
Өфө ҡалаһы.
"Киске Өфө" гәзите, №50, 19 - 25 декабрь 2025 йыл

КИРЕ СЫҒЫРҒА