Ошо көндәрҙә Рәми Ғарипов исемендәге 1-се Башҡорт республика гимназия-интернатында йәйәнән уҡ атыу буйынса "Беренсе гимназия кубогы" республика турниры үтте.

Бәйгелә 110 уҡсы ҡатнашты һәм, йәштәренә ҡарап, төрлө дистанцияларҙа көс һынашты. Көндәрҙең һыуыҡ тороуына ҡарамай, балалар Ауырғазы, Ишембай, Әбйәлил, Белорет, Ҡырмыҫҡалы, Ғафури, Бөрйән, Бишбүләк, Иглин, Өфө райондарынан һәм Өфө, Белорет ҡалаларынан килгәйне. "Ярыш күтәренке рухта үтте, йәш спортсылар юғары һөҙөмтәләр күрһәтте. Был йәш уҡсыларҙың оҫталығы тураһында һөйләй. Тейешле шарттар булдырған өсөн гимназия-интернат директоры Илнур Рифат улы Салиховҡа, һәр эштә ярҙамлашҡан коллегаларыма, мәктәп хеҙмәткәрҙәренә рәхмәт белдерәбеҙ", - тине бәйгене ойоштороусы Рәйес Низаметдинов.
Үҙ йәштәре араһында Лиза Давидзон (Иглин районы), Марсель Ҡалсин (Ғафури), Мәҙинә Сәмсетдинова (Белорет), Самир Латыпов (Өфө), Розалина Ҡаһарманова (Бөрйән), Ислам Ғәлиәкбәров (Белорет) еңеү яуланы. Ә Р. Ғарипов исемендәге БРГИ уҡыусыһы Самир Латипов абсолют еңеүсе исеменә лайыҡ булды.
"Беренсе гимназия кубогы" быйыл икенсе тапҡыр үтте һәм ул артабан йәйәнән уҡ атыу буйынса йыл да ойошторолған иң күләмле балалар һәм үҫмерҙәр турниры булып танылыр, тигән өмөт бар.

"Киске Өфө" гәзите, №4, 30 ғинуар – 5 февраль 2026 йыл

КИРЕ СЫҒЫРҒА