Башҡортостан Республикаһы Башлығы Радий Хәбировтың Дәүләт Йыйылышы - Ҡоролтайға Мәрәжәғәтнамәһе тураһында федераль сәйәсмәндәр ниндәй фекерҙә?

Александр Точенов, РФ Президенты ҡарамағындағы Граждандар йәмғиәтен үҫтереү һәм кеше хоҡуҡтары буйынса совет секретары: "Башҡортостан етәкселегенә бер юлы ике мәсьәлә: Махсус хәрби операцияға ярҙам итеү һәм республиканы үҫтереү буйынса эшләргә тура килә. Республиканың МХО-ла ҡатнашыусылар һәм тыныс тормошҡа әйләнеп ҡайтыусылар менән алып барылған һәм алып барыласаҡ эштәрен айырыуса билдәләп үтергә кәрәк. Ветерандар менән эш медицина реабилитацияһы, эшкә урынлаштырыу һәм социаль шарттарға яраҡлаштырыу буйынса өс йүнәлештә ҡоролған. Башҡортостанда был йәһәттән дөрөҫ йүнәлеш алынған һәм тейешле бурыстар билдәләнгән. Ә төп маҡсат беҙҙең хәҙер берәү: бергәләп кенә еңеүгә өлгәшәсәкбеҙ!"

Алексей Мухин, Сәйәси мәғлүмәт үҙәгенең генераль директоры: "Радий Хәбиров Мөрәжәғәтнамәһенең трансляцияһын ҡараным. Һәм, беләһегеҙме, мине нимә һоҡландырҙы? Мәғәнәүи бөтөнлөк. Бөгөн күптәр ике ултырғыста ултырырға тырыша. Ә бына Башҡортостанда тураһын ярып әйттеләр: беҙҙең алда торған төп бурыс - Еңеү. Хәбировтың "Бөтәһе лә Еңеү өсөн" тигән бер үк төп ҡағиҙәне күп тапҡырҙар ҡабатлауы - башҡа төрлө мәсьәләләргә бүлгеләнмәйенсә һәм "Был тиҙҙән үтеп китер" тимәйенсә, буш хыялдар һәм һүҙҙәрҙән баш тартыу ул. Һәм, ҡағиҙә булараҡ, шуныһы мөһим: Башҡортостан Башлығы һөйләп кенә ҡалмай, ә урындарҙа ысын мәғәнәһендә эштәрҙе ойоштора".

Евгений МИНЧЕНКО, Халыҡ-ара сәйәси экспертиза институты директоры: "Мөрәжәғәтнамәнең "Бөтәһе лә Еңеү өсөн" тигән төп тезисы республика менән идара итеүҙең бөтөн системаһын ойоштороу принцибына әйләнә. Хәбиров, ярым-яртылаш мөнәсәбәт һәм ситтән күҙәтеү осоро үтте, тип туранан-тура белдерҙе һәм МХО маҡсаттарына өлгәшеү өсөн төбәк ресурстарын туплауҙы мөһим урынға ҡуйҙы. Башҡортостандың иҡтисади һәм технологик үҫеше милли хәүефһеҙлек ихтыяждары менән юғары кимәлдә тап килә. Төбәк ил кимәлендәге программаларҙы үтәп кенә ҡалмайынса, үҙенең комплекслы ҡарарҙарын уйлап сығара (дрондар етештереүҙән алып, ветерандарҙы реабилитациялауға тиклем), иң яҡшы ғәмәлдәрҙе таратыуҙа ышаныслы терәк һәм өлгө булып тора".

Дмитрий Орлов, Сәйәси һәм иҡтисади коммуникациялар агентлығының генераль директоры: "Радий Хәбировтың "Бөтәһе лә Еңеү өсөн"девизы менән сығыш яһаған Мөрәжәғәтнамәһе уңыштар һәм киләсәккә пландар хаҡындағы ғәҙәти отчет сиктәренә генә бикләнеп ҡалмай. Ул иҡтисадты, социаль сәйәсәтте, фәнде һәм кадрҙар стратегияһын тәүләп ҡәтғи рәүештә берҙәм милли маҡсатҡа буйһондороусы стратегик манифест кимәленә күтәрелә".

Максим Григорьев, РФ Йәмәғәт палатаһы ағзаһы, МХО-ла ҡатнашыусы, Украина неонацистары енәйәттәре буйынса халыҡ-ара йәмәғәтселек трибуналы рәйесе: "Мөрәжәғәтнамә өлгөлө яңғыраш алды һәм төбәк үҫешенә аныҡ йүнәлеш бирҙе. Радий Фәрит улын мин күптән беләм һәм шулай тип ышаныслы белдерәм: ул һәр ваҡытта ла инанған илһөйәр булды. Был бигерәк тә бөгөн - уның хәрби хәрәкәттәр барған зоналарға даими рәүештә барып ҡайтыуҙары һәм яугирҙар менән яҡындан аралашыуында ла асыҡ күренә. Башҡортостан егеттәре ҡаһарманлыҡ өлгөһө күрһәтә - быны күптәр, шул иҫәптән дошман да таный хатта".

"Киске Өфө" гәзите, №5, 6 - 12 февраль 2026 йыл

КИРЕ СЫҒЫРҒА