Радий Хәбиров республиканың Дәүләт Йыйылышы - Ҡоролтайға Мөрәжәғәтнамәһендә радиоэлектрон көрәш системаларын үҫтереү, асыҡлау һәм баҫыу темаһына айырым туҡталды. Ул FPV-дрондар, разведка дрондары һәм тотоп алыусылар эшләү һәм етештереү төп бурыс булып ҡала, тип билдәләне.

- Башҡортостан пилотһыҙ авиация һәм радиоэлектрон көрәш буйынса компетенция үҙәктәренең береһенә әүерелде. Төбәктәрҙең "дронофикацияһы" рейтингының тәүге өсәүһенә инәбеҙ. Беҙҙең уникаль предприятиелар Рәсәйҙә беренсе булып пилотһыҙ аппараттар өсөн FPV-дрондар һәм электр двигателдәре сығара башланы. Президент ҡушыуы буйынса беҙ бөтә класлы граждандар һәм хәрби дрондар әҙерләйбеҙ һәм етештерәбеҙ. Инженерҙарыбыҙ "Ҡыш Бабай" тип атаған ауыр дрон осош һынауҙарын үтте һәм бөгөн яугирҙарыбыҙға ярҙам итә.
Һуңғы ике йылда МХО зонаһына бөтәһе 10 меңдән ашыу дрон ебәрелгән. Быйыл 20-нән ашыу компания-резидентты берләштереү, пилотһыҙ аппараттар һәм уларҙың компоненттарын етештереүҙе арттырыу өсөн төбәк ғилми-етештереү үҙәген асырға ниәтләйбеҙ. 1 апрелдән БПЛА-ны поставкалау күләмен 50 процентҡа арттырырға ҡушам.
"Ҡалҡаныбыҙҙы һәм ҡылысыбыҙҙы" ҡойоусыларға, технологик өҫтөнлөктө тәьмин итеүселәргә айырым рәхмәт белдерәм. Улар - Ростехҡа ҡараған ОДК-УМПО кеүек оборона предприятиелары инженерҙары, конструкторҙары. Баштан уҡ беҙ ысын халыҡ инициативаһын күрәбеҙ. Ошо ваҡыт эсендә халыҡ оҫталары, ысын "кулибиндар" тыуҙы, улар, бигерәк тә тәүге осорҙа, инженерҙарыбыҙға иң шәп әйберҙәр уйлап табырға ярҙам итте.
Беҙҙең БПЛА операторҙары алғы һыҙыҡта мөғжизәләр тыуҙыра. Шайморатов исемендәге башҡорт ирекле батальонынан "Африка" позывнойлы яугир 200-ҙән ашыу сәпте юҡ итте. Донецк Халыҡ Республикаһы Геройы исеменә лайыҡ булды.
Белеүегеҙсә, Оборона министрлығы ғәскәрҙәрҙең яңы төрөн - пилотһыҙ системалар ғәскәрен булдыра. Уға ҡабул итеү иғлан ителгән дә инде. Республикабыҙҙа был өлкәлә әҙерлекле белгестәр етерлек. Тиҫтәләгән йәш ирекмәндең үҙ белеме менән еңеүгә өлөшөн индерергә ҡарар итеүен дә беләм. Был - ысынлап та, юғары оҫталыҡ талап иткән ысын ирҙәр эше. Владлен Татарский исемендәге пилотһыҙ осоусы аппараттар операторҙарын әҙерләү үҙәге йәштәргә фронтта талап ителгән һөнәр һәм тыныс тормошта лайыҡлы эш бирергә әҙер.

"Киске Өфө" гәзите, №5, 6 - 12 февраль 2026 йыл

КИРЕ СЫҒЫРҒА