Башҡорт балы, башҡорт ҡымыҙы, башҡорт ҡурайы янында бөтә илгә дан ҡаҙанған башҡорт шәле лә бар. Башҡорт дебет шәле Башҡортостан халҡын ғына түгел, бөтә Урал буйын, Ырымбур өлкәһен, Үзбәкстан, Алыҫ Көнсығыш, Себер, Мәскәү, Ханты-Мансы тарафтарын да йылыта. Уның шифалы йылыһын халҡыбыҙ борондан белгән, дебет алыу, һайлау серен, бәйләү оҫталығын ҡулдан-ҡулға тапшырған.

"Ағинәй юлы" район ағинәйҙәр эстафетаһы сиктәрендә Тәүәкән күп тармаҡлы мәҙәниәт йортонда дебет шәлгә арналған йылы, матур, файҙалы һәм күңелле осрашыуға йыйылды район ағинәйҙәре, ауыл уңғандары, оҫталары. Байрамға мәртәбә өҫтәп, "Киске Өфө" гәзитенең баш мөхәррире Гөлфиә Янбаева, район "Ағинәй" йәмәғәт ойошмаһы етәксеһе Гөлфиә Искәндәрова, Теләүембәт ауыл биләмәһе хакимиәте башлығы Булат Каразбаев ҡатнашты. Фойела күҙҙең яуын алып торған шәлдәрҙән, шәл бәйләү өсөн ҡулланған ҡорамалдарҙан күргәҙмәләр ҡоролдо, шәл бәйләүсе уңғандар дебет менән һатыу итте, һатып алды.
Байрамдың икенсе өлөшө тамаша залында дауам итте. Килгән ҡунаҡтарҙы сәләмләгәндән һуң, сәңкемдәр "Шәл өмәһе" тигән кис ултырыу йолаһын сәхнәләштереп, дебет шәлдең борондан килгән кәсеп икәнен раҫланы, кәзә һөтөнөң, дебетенең файҙаһы тураһында бәйән итте. Ошо шөғөлгә арналған әйтемдәр, мәҡәлдәр, һынамыштар, йыр-бейеүҙәр, гармун моңдары менән үрелеп барған кисәлә ысын мәғәнәһендә дебет шәлгә мәҙхиә йырланды. Бикбулат, Мәҡсүт, Йомағужа, Сирбай, Сапыҡ, Исем, Аҙнағол, Дауыт-Ҡайып, Теләүембәт уңғандары шәл бәйләү хәтирәләре менән уртаҡлашты, ул хәтирәләр, әлбиттә, хә-ҙерге заманда ла телдән төшмәгән "Шәл бәйләнем, шәл бәйләнем, шәлем түңәрәк түгел..." йыры менән оҙатылып барҙы. - Бындай байрамдар ауыл тормошон йәнләндереп, нурландырып ебәреүгә, йәш быуын күңелендә хеҙмәткә хөрмәт тәрбиәләүгә, ата-бабаларыбыҙҙың онотола барған шөғөлдәрен тергеҙеүгә булышлыҡ итә - бына был тырышлыҡ беҙҙең фиҙаҡәр ағинәйҙәребеҙ иңендә лә инде, - ти сараны ойоштороуға һәм уҙғарыуға ҙур көс һалған мәҙәниәт хеҙмәткәре Гөлдәр Әбдрәхимова.

Гөлназ СӘЙЕТБАТТАЛОВА.
Күгәрсен районы.
"Киске Өфө" гәзите, №5, 6 - 12 февраль 2026 йыл

КИРЕ СЫҒЫРҒА