Өфөнөң "Кузнецов затоны" биҫтәһендә Волга буйы федераль округындағы иң ҙур мәктәп эш башланы. 2 200 балаға иҫәпләнгән 164-се мәғариф үҙәген асыу тантанаһында Башҡортостан Башлығы Радий Хәбиров ҡатнашты.

- Был мәктәп ысын мәғәнәһендә балалар өсөн инновацион тәрбиә, мәҙәни, спорт һәм ял итеү үҙәге. Уның уҡыусыларының ҡаҙаныштары тураһында күп тапҡыр ишетербеҙ әле, тип ышанам. Иң мөһиме, мәктәп Тыуған илен яратҡан кешеләрҙе тәрбиәләһен, - тине Радий Хәбиров.
Бөтәһе 96 уҡыу кабинеты, дүрт спорт залы, стадион, бер нисә уйын майҙансығы, медицина блогы булған, һаулыҡ мөмкинлектәре сикләнгән балалар өсөн лифт, пандустар һәм айырым санитар бүлмәләр йыһазландырылған 31 мең квадрат метрҙан ашыу майҙанлы мәктәп бинаһы "А" хәрефенең архитектура формаһында төҙөлгән. Яңы мәғариф үҙәге директоры Миләүшә Мырҙағәлина учреждениела "Тулы көн мәктәбе" программаһын тормошҡа ашырыуҙары тураһында хәбәр итте. Дәрестән һуң уҡыусыларҙың түңәрәктәргә һәм секцияларға йөрөү, ижад һәм спорт менән шөғөлләнеү мөмкинлеге бар. Бынан тыш, бында "Ломоносов фән мөйөшө", "Кулибин оҫтаханаһы", "Пушкин ҡунаҡ бүлмәһе" кеүек профилле йүнәлештәр менән "Мөмкинлектәр мәктәбе" проекты эшләй. Шулай уҡ медицина, полиция, психология-педагогия, эшҡыуарлыҡ кластары һәм креатив индустриялар класы ойошторолған. Балалар робототехниканы, авиамоделләштереү, программалау, блоггинг, театр һәм ораторлыҡ сәнғәтен, актерлыҡ оҫталығын, мультипликация, нәшриәт эшен, спорт туризмын өйрәнә, шулай уҡ шахмат, шашка, волейбол, гандбол, баскетбол уйнай ала.
- Әлегә мәктәптә 1-8 кластарҙа 1 339 бала уҡый. Беҙҙә беренсе кластар унау, - ти Миләүшә Мырҙағәлина. - Быйыл 9-11-се класс уҡыусыларын да йыйырға планлаштырабыҙ. Ә 2026 йылдың 1 сентябренән ата-әсәләр һорауы буйынса һаулыҡ мөмкинлектәре сикләнгән балалар өсөн коррекция һәм аутизм спектры боҙолған уҡыусылар өсөн кластар асасаҡбыҙ.
Радий Хәбиров заманса видеокүҙәтеү системаһы менән һаҡ пунктын, биология һәм башланғыс кластар кабинеттарын, лабораторияларҙы, дизайн студияһын, 494 урынлыҡ тамаша залын, спорт залын, 700 урынлыҡ ашхананы һәм эко-кафены ҡараны. Бөтә кабинеттар - интерактив ҡорамалдар, ә оҫтаханалар заманса техника менән йыһазландырылған.
- Волга буйы федераль округындағы иң ҙур мәктәп буш урында тиерлек барлыҡҡа килде. Был мөһим объектты төҙөү беҙгә еңел бирелмәне. Тапшырыу ваҡытын бер нисә тапҡыр күсерергә тура килде. Ниһайәт, быларҙың барыһы ла артта ҡалды, - тип билдәләне республика Башлығы журналистар менән әңгәмәлә.

"Киске Өфө" гәзите, №7, 20 - 26 февраль 2026 йыл

КИРЕ СЫҒЫРҒА