Пилотһыҙ системалар ғәскәрҙәре сафы 2025 йылдың октябренән әүҙем тулылана. Билдәле булыуынса, заман, бөгөнгө яу яланы хәлдәре талап иткән алдынғы технологияларға нигеҙләнгән яңы ғәскәр төрө Юғары баш командующий Владимир Путин һәм оборона министры Андрей Белоусов ҡарары менән булдырылды.

Башҡортостанда ла пилотһыҙ ғәскәрҙәргә хәрби хеҙмәткәрҙәр йыйыу бара. Өфөлә БПЛА ғәскәрҙәрен тулыландырырға теләүселәр өсөн уҡытыу ойошторолған. Ошо көндәрҙә Махсус хәрби операция зонаһына юлланған "Друг" позывнойлы яугир һөйләүенсә, ул тәүҙә "Черемушки" шифаханаһы базаһында урынлашҡан "Защитник" үҙәгенә мөрәжәғәт иткән. Контрактҡа ҡул ҡуйғас, уны уҡырға йүнәлткәндәр. Унда бөтә төр дрондарҙы осороу, ҡорамалдарҙы көйләү, программалау алымдары, ремонт эштәре, инженерлыҡ әҙерлеге һәм боеприпастар менән эш итеү буйынса курс үткән. Уҡыу тамамланғас, хәрби-иҫәп һөнәрен алыу тураһында рәсми таныҡлыҡ тапшырғандар.
"Пилотһыҙ системалар ғәскәрҙәре подразделениеларына, дөйөм алғанда, операторҙар ғына түгел, ремонтлаусылар, программалаусылар ҙа кәрәк. Оборона министрлығы бойороғона ярашлы, 18-ҙән 35 йәшкә тиклемге ир-егеттәргә өҫтөнлөк бирелә. Шулай уҡ 45 йәшкә тиклемге йәштәгеләр водитель, сапер, ашнаҡсы кеүек хәрби һөнәр буйынса ҡарала. Контракт бер йылға төҙөлә, был ваҡыт үткәндән һуң запасҡа сығыу мөмкинлеге бар. Хәрби хеҙмәткәрҙе, уның үҙ иркенән тыш, БПЛА менән идара итеү менән бәйле булмаған башҡа һөнәргә йәки ғәскәрҙәрҙең башҡа төрөнә күсереп булмай. Тулы социаль пакет бирелә. Пилотһыҙ системалар ғәскәрҙәре хеҙмәткәре, алғы һыҙыҡтағы башҡа яугирҙар кеүек үк, бөтә түләүҙәргә, льготаларға һәм социаль гарантияларға хоҡуҡлы", - тип аныҡлыҡ индерҙе Башҡортостан Контракт буйынса хәрби хеҙмәткә һайлап алыу пунктынан яуаплы офицер.
БПЛА операторҙары Махсус хәрби операция зонаһының алғы һыҙығынан алыҫта хеҙмәт итә. Шуға ла хәүефһеҙлек кимәле юғары.
Пилотһыҙ системалар ғәскәрҙәренә хәрби хеҙмәткә инергә теләүселәр йәшәгән урыны буйынса хәрби комиссариатҡа мөрәжәғәт итә ала. Шулай уҡ быны Өфө ҡалаһы, Революция урамы, 156 адресы буйынса урынлашҡан Контракт буйынса хәрби хеҙмәткә һайлап алыу пункты аша ла эшләп була. Ғаризаны Дәүләт хеҙмәттәре порталында ҡалдырырға ла мөмкин.

"Киске Өфө" гәзите, №12, 27 март – 2 апрель 2026 йыл

КИРЕ СЫҒЫРҒА