9 майҙа Башҡортостандың баш ҡалаһында 1941-1945 йылдарҙағы Бөйөк Ватан һуғышында Еңеүҙең 81 йыллығына арналған еңеү парады үтәсәк. Дүшәмбе Хөкүмәттең оператив кәңәшмәһендә Хөкүмәт вице-премьеры Ирек Сәғитов был хаҡта тулыраҡ мәғлүмәт бирҙе.

- Октябрь проспектында көндөҙгө 12-нән 1-гә тиклем Өфө гарнизоны хәрбиҙәренең тантаналы үтеүе Төп сараларҙың береһе буласаҡ, - тип белдерҙе Ирек Сәғитов. - Унда Өфө территориаль гарнизоны хәрбиҙәре, федераль башҡарма власть органдарының территориаль органдары хеҙмәткәрҙәре, "Башҡортостан" полкы һәм С.Юлаев исемендәге батальондың МХО-ла ҡатнашыусылары, хәрби хәрәкәттәр һәм хәрби хеҙмәт ветерандары, уҡыу йорттары курсанттары һәм кадеттарынан 2 мең самаһы кеше ҡатнашасаҡ.
Уның һүҙҙәренсә, хәрбиҙәрҙән һуң Муса Гәрәев исемендәге тәүге осоу әҙерлеге мәктәп-интернаты кадеттары, "Шайморатов" класы уҡыусылары, юнармеецтар һәм диңгеҙ пехотасылары кадет кластарының (60-ар кеше) Еңеү байрағы күсермәләрен, Рәсәй Федерацияһы, Башҡортостан Республикаһы һәм Өфө ҡалаһы флагтарын күтәреп үтеүе планлаштырыла.
Парад командующийы итеп хәрби комиссар урынбаҫары полковник Ринат Латипов тәғәйенләнгән. Парадты республиканың хәрби комиссары полковник Михаил Блажевич ҡабул итә. Артабан 16 берәмек хәрби техника үтергә тейеш, шуларҙың дүртәүһе - Бөйөк Ватан һуғышы осоронан. Парад Рәсәй һәм Башҡортостан флагтарын күтәргән Ка-32, Ка-26, Ми-8 вертолеттары һәм 5 бәләкәй авиация самолеты осошо менән тамамлана. Тантаналы йөрөш буйынса иң яҡшы парад расчеттары билдәләнә. Еңеүселәргә Башҡортостан Республикаһы Башлығының күсмә Кубогы һәм дипломдар тапшырыла.

"Киске Өфө" гәзите, №18, 8 - 14 май 2026 йыл

КИРЕ СЫҒЫРҒА