Мин инде ике йылдан ашыу, ирекмән булараҡ, "Көслө рухлылар. Үҙебеҙҙекеләрҙе ташламайбыҙ" командаһы менән бергә Курск, Белгород, Липецк, Донецк халыҡ республикалары, Херсон, Запорожье яҡтарына гуманитар ылау оҙатыуҙа ҡатнашам.

Ирекмәнлек юлы нисек башланып китте? Башта миңә таныштарым: "Егеттәргә кейем кәрәк-яраҡтары менән ярҙам итергә ине", - тип мөрәжәғәт иткәйне. Шундуҡ кәрәкле кейемдәр һатып алып тапшырҙым. Унан инде һаҡ селтәрҙәре үреүҙә ҡатнаша башланыҡ. "Башҡортостандың ышаныслы тылы" тип аталған фондтың "Башҡортостан аш-һыуы. Беҙ һеҙҙең менән Еңеүгәсә бергә" тигән айырым бер төркөмө бар. Мин унда ла ағза булып торам. Беҙ киптерелгән борщ, рассольник, туҡмас ризыҡтарҙы әҙерләйбеҙ, йәшелсә-емештәрҙе киптерәбеҙ, йә иһә быҡтырабыҙ, консервалайбыҙ. Ике аҙнаға бер тапҡыр йыйылып, уларҙы тейешле урынға матур килеш барып етерлек итеп төрөп әҙерләйбеҙ.
"Беренсе тирмә" төбәк проекты асылғас, йөрәк ҡушыуы буйынса Луганск һәм Донецк халыҡ республикаларындағы госпиталдәрҙә ятҡан яралы хәрбиҙәргә ярҙам итеүселәр төркөмөнә ҡушылып киттем. Яңы йылды Луганск госпиталендә ҡаршыланыҡ. Ул беренсел госпиталь, йәғни яралыларҙы эвакуациялау урыны. Бахмуттан яраланып ҡайтҡандарҙы алып киләләр ине. Госпиталгә барып инәһең, иң тәүҙә ҡан, эрен, тир еҫе танауға бәрелә. Башлыса ауыр яралылар, аяҡһыҙ-ҡулһыҙ ҡалғандары ла бар. Башта юғалып ҡалғандай булаһың, сөнки был хәлдәрҙе кисереүе ныҡ ауыр. Ике-өс көндән өйрәнеп китәһең инде. Бөтөн эштәрҙе бүлешәбеҙ, кем укол һала, кем яраланы бәйләй һ.б. Ашатабыҙ-эсерәбеҙ, эвакуацияға әҙерләйбеҙ. Мин микрохирургияла эшләнем. Беҙ иртәнге һигеҙҙән киске етегә тиклем эшләй инек. Ялһыҙ эшләргә тура килде.
Төрлө милләт вәкилдәре йыйылған госпиталдә башҡортса һөйләшеп йөрөй торғайныҡ. "О, Башҡортостан ҡыҙҙары!" - тип рәхмәт әйтәләр, "Телегеҙ шундай йомшаҡ, моңло, йыр һымаҡ", - тип маҡтап ебәрәләр.
Үҙебеҙҙең милләттәштәрҙе лә осраттыҡ. Бер яҡташыбыҙ алғы һыҙыҡта урманда ашамай-эсмәй ете көн ятҡан, бирешмәгән. Рух ныҡлығы ярҙам иткән. Алғы һыҙыҡта булған тағы бер егетебеҙ ике аҙна ризыҡ ҡапманым, тип һөйләгәйне. "Үлән тамырҙарын, хатта тупраҡты ашарға тура килде", - тине. Бына шундай һынауҙар үтә ундағы егеттәр. Шундай шәп яҡташтарыбыҙ менән ғорурланып ҡайттыҡ.
"Ҡулдан - ҡулға" тип аталған гуманитар ылау менән Луганск, Донецк, Белгород, Курск һәм башҡа ҡалаларҙа ун биш тапҡыр булырға тура килде. Ылауҙар ҙа төрлө була. Уларҙың ҡайһыларын складта ғына ҡалдырып китергә була. Ә беҙ алып бара торған ылауҙы ата-әсәләр ебәрә, шуға ла ул һәр ваҡыт адреслы. Посылкаларҙы мотлаҡ егеттәрҙең ҡулына тотторабыҙ. Артабан да уларҙың һәр береһе менән бәйләнештә торорға тырышабыҙ. Шылтыратышып, хәл белешәбеҙ. Бер-ике һүҙ ишетһәләр ҙә ҡыуанып китәләр. Бер барғанда Иглин районынан киткән башҡорт ағайы менән тап булыштыҡ. "Тағы ла бер минут ҡына һөйләш, башҡортса һөйләшкәнде ишеткем килә", - тигән була. Беҙҙең менән һөйләшеү улар өсөн ҙур бер ваҡиға һымаҡ ҡабул ителә бит инде.
Яңы йылда гуманитар ылау менән - 110, мартта 146 урында булдыҡ. Мариуполдә инвалидтар йәмғиәтендә осраштыҡ, балаларға бүләктәр алып барҙыҡ. Бына ошондай ирекмәнлек эше йәшәү, кешелеклек, мәрхәмәтлек, теләктәшлек кеүек төшөнсәләргә тәрәнерәк мәғәнә бирә һәм тормоштоң ҡәҙерен нығыраҡ аңларға, баһаларға ярҙам итә.

Зөһрә БҮЛӘКОВА.
"Киске Өфө" гәзите, №18, 8 - 14 май 2026 йыл

КИРЕ СЫҒЫРҒА