15 майҙа, Халыҡ-ара ғаилә көнөндә, Башҡорт дәүләт ҡурсаҡ театрында донъя халыҡтары әкиәттәрен йәш башҡарыусыларҙың төбәк-ара VII "Һаумы, һаумы, әкиәт!" конкурсына йомғаҡ яһалды.

Сара республиканың Мәғариф министрлығы тарафынан йыл һайын уҙғарыла. Быйыл 15 майға тиклем үткән конкурста Башҡортостандан, шулай уҡ Силәбе өлкәһенән 600-гә яҡын мәктәпкәсә һәм дөйөм белем биреү ойошмалары уҡыусылары ҡатнашты. Сәхнәнән башҡорт, рус, татар, сыуаш, мари, удмурт, мордва, әзербайжан, белорус, немец телдәрендә әкиәттәр яңғыраны, сәхнәләштерелде, яһалма интеллект ярҙамында буктрейлерҙар һәм видеофильмдар күрһәтелде.
Гран-при яулаусы абсолют еңеүселәр:
- яңғыҙ башҡарыусылар араһында - Өфөнөң 18-се Башҡорт балалар баҡсаһы, Саҡмағош районы Саҡмағош ауылының 5-се балалар баҡсаһы, Рамаҙан Өмөтбаев исемендәге Башҡорт лицейы һәм Сибай ҡалаһы гимназияһы;
- әкиәт сәхнәләштергән фольклор коллективтар араһында - Өфөнөң 150-се балалар баҡсаһы, Федоровка районы Федоровка ауылының "Ҡыңғырау" балалар баҡсаһы, Өфө ҡалаһының 161-се лицейы, Бишбүләк районы Баҙлыҡ ауылы мәктәбе, шулай уҡ Өфө ҡалаһының Рауил Бикбаев исемендәге 102-се Башҡорт гимназияһынан Көмөшбаевтар ғаиләһе;
- "Яһалма интеллект күҙлегенән әкиәт донъяһы" тип аталған яңы номинацияла иң яҡшы буктрейлер тип танылыусылар - Өфөнөң 75-се "Аҡбуҙат" Башҡорт балалар баҡсаһы, Ҡырмыҫҡалы районы Ҡырмыҫҡалы ауылының 1-се балалар баҡсаһы, Өфө ҡалаһының 163-сө Мәғариф үҙәге, Хәйбулла районы Аҡъяр ауылының 2-се урта дөйөм белем биреү мәктәбе.

"Киске Өфө" гәзите, №20, 22 - 28 май 2026 йыл

КИРЕ СЫҒЫРҒА