Үҫмерҙәрҙең күбеһе социаль селтәрҙәрҙәге трендтар тураһында бәхәсләшеп, йәйге каникулға әҙерләнгәндә, Стәрлетамаҡтан 9-сы класс уҡыусыһы Руслан Әминев Ҡытайға барырға йыйына. Юҡ, каникулға түгел. Руслан илдең иң яҡшы 5 йәш иҡтисадсыһы иҫәбенә инде һәм июлдә халыҡ-ара иҡтисади олимпиадала Рәсәй исеменән сығыш яһаясаҡ.

Руслан Стәрлетамаҡтың 3-сө башҡорт лицей-интернатында уҡый. Уның уңышы осраҡлы ғына тип әйтеп булмай. Иң тәүҙә ул Ломоносов исемендәге Мәскәү дәүләт университетына юл асыусы Бөтә Рәсәй олимпиадаһы призеры статусына эйә була. Ул саҡта Мәскәүҙә Русланға бар илдән йыйылған иң текә 70 уҡыусы араһында иҡтисад, финанс һәм стратегия буйынса имтихан тапшырырға тура килә һәм 24 еңеүсе уҡыусы иҫәбендә финалға сыға. Уларҙы командаларға берләштерәләр, Гарвард бизнес мәктәбенең реаль кейсын бирәләр һәм уны инглиз телендә яҡларға ҡушалар. Руслан еңеп кенә ҡалмай, ул биш лидер иҫәбенә инә.
- Бындай кимәлдә еңеү өсөн үҙенсәлекле сифаттарға эйә булырға кәрәк, - тип иҫәпләй олимпиада еңеүсеһенең остазы - 3-сө башҡорт лицейының математика һәм иҡтисад уҡытыусыһы Руслан Ғабдрахманов. - Беренсенән, ныҡлы нервылар кәрәк. Гарвард мәсьәләләрен жюри күҙлегенән ҡаты тайминг шарттарында хәл итеү - стресс, уны һәр өлкән топ-менеджер күтәрә алмай. Икенсенән, бизнес-фекерләү. Трендтарҙы күрә белергә, хәүефте һанарға һәм ҡағыҙҙа ғына түгел, ә ысынбарлыҡта эшләгән ҡарарҙар тәҡдим итергә кәрәк. Өсөнсөнән, харизма һәм тел. Проектты инглиз телендә яҡлау телде яҡшы белеүҙе генә түгел, ә ораторлыҡ оҫталығын да талап итә. Руслан - ҡатмарлы бурыстарҙан ҡурҡмаған һәм хатта ҡаты конкуренция шарттарында ла һөҙөмтәгә эшләргә әҙер булған егеттәрҙең береһе. Беҙ системалы әҙерләндек: теорияны ғына түгел, ә заданиеларҙың төрлө варианттарын һәм йәмәғәт яҡлау күнекмәләрен ентекле эшләнек. Русланды әҙерләүгә Өфөнөң "Аврора" таланттарҙы үҫтереү үҙәге һәм Стәрлетамаҡтың мәғлүмәт-методик үҙәге лә йәлеп ителде.
Шулай итеп, 12-20 июлдә Руслан Әминев Ҡытайҙа ил намыҫын яҡлаясаҡ. Был исемде иҫегеҙҙә тотоғоҙ, беҙ уның тураһында тағы ла ишетербеҙ әле.

"Киске Өфө" гәзите, №21, 29 май - 4 июнь 2026 йыл

КИРЕ СЫҒЫРҒА