Ишембай ябыҡ типтағы махсус уҡыу-тәрбиә учреждениеһы тәрбиәләнеүселәре "Урал батыр" эпосы һәм AY YOLA төркөмөнөң иң популяр "Һомай" йырынан илһам алып, башҡорт кейемдәре коллекцияһын булдырҙы.

Башта ҡыҙҙар эпосты ентекләп өйрәнә, һуңынан эскиздар эшләй һәм күлдәктәр тегә. Проектты тормошҡа ашырыу идеяһынан алып тормошҡа ашырыуға тиклем ни бары ярты йыл ғына ваҡыт үтә. Кейемдәр боронғо кейеҙ баҫыу техникаһын ҡулланып эшләнгән. Шулай уҡ һәр костюмда традицион элементтар бар: орнаменттар, сәйлән һәм тәңкәләр менән сигеү, әберкә һәм манжеталар. Әммә шул уҡ ваҡытта һәр күлдәк заманса һәм уникаль булып сыға.
Коллекцияны халыҡ-ара кимәлдә тәҡдим итергә әҙерләнәләр. "Беҙ үҙебеҙҙе ноябрҙә Санкт-Петербургта үтәсәк халыҡ-ара мода аҙналығында һынап ҡарарға теләйбеҙ. Коллекция тураһында мәғлүмәтте ойоштороусыларға ебәрҙек. Әгәр ул уларға оҡшаһа, мотлаҡ ҡатнашасаҡбыҙ", - тип һөйләне учреждение етәксеһе Гүзәл Шаһиева.

"Киске Өфө" гәзите, №21, 29 май - 4 июнь 2026 йыл

КИРЕ СЫҒЫРҒА