Иглиндан "Ставрос" позывнойлы яугир 2024 йылда Оборона министрлығы менән контракт төҙөй һәм Махсус хәрби операция зонаһына юллана. Үҙе әйтеүенсә, ул иртәрәк тә Рәсәй Ҡораллы көстәре сафына баҫыр ине, ләкин туғандары, ғаиләһе ныҡ хәүефләнеү сәбәпле, ҡарарҙы кисектерә килә. Ваҡыт үтеү менән улар яҡындарының МХО-ға барыу ниәте менән килешә.

Рәсәй Оборона министрлығы менән контрактҡа ҡул ҡуйғанға тиклем "Ставрос" техник-программист һөнәрен ала, компьютерҙарҙы, ноутбуктарҙы ремонтлау һәм смартфондарҙы яңынан программалау менән шөғөлләнә. Был күнекмәләр һәм оҫталыҡ хәрби һөнәр һайлауында төп критерий булып тора. Хәҙер "Ставрос" пилотһыҙ системалар ғәскәрҙәрендә FPV-дрон операторы булып хеҙмәт итә.
"Ставрос" үҙ иҫәбенә юҡ ителгән бер нисә ВСУ техникаһы, күҙәтеү пункттары, ут позициялары, орудиелар, минометтар һәм дошмандың БПЛА нөктәләрен яҙған. "Беҙҙең егеттәр алғы һыҙыҡта үҙҙәрен хәүефһеҙ тойһон өсөн, хәлдән килгәндең барыһын да эшләйем", - ти яугир. Күрһәткән батырлығы һәм ҡаһарманлығы өсөн ул Жуков, генерал Шайморатов миҙалдары, шулай уҡ "Хәрби батырлыҡ өсөн" миҙалы менән наградланған.
"Пилотһыҙ системалар ғәскәрҙәренә хеҙмәткә башлыса БПЛА-ны хеҙмәтләндереү һәм уны хәрби шарттарҙа оҫта ҡулланыу өсөн кәрәкле белем нигеҙҙәренә эйә булғандар алына", - ти Өфөләге Берләштерелгән пилотһыҙ технологиялар подразделениеһы етәксеһе Рэдвал Неволин.
Тәүге танышыу дәрестәре "Защитник" Контракт буйынса граждандарҙы хәрби хеҙмәткә һайлап алыу пунктында үтә. Владлен Татарский исемендәге БПЛА операторҙарын тактик һәм махсус тактик әҙерләү үҙәге инструкторҙары яугирҙарға дрондарҙың ҡоролошон аңлата һәм уларға идара итеү нигеҙҙәре буйынса дәрестәр бирә. Ошо рәүешле улар хәрби хеҙмәткәрҙең һөнәри яраҡлылығын билдәләй.
"Беҙ егеттәрҙе тәүҙә төркөмдәргә бүләбеҙ. Уларҙың береһенә - гражданлыҡ һөнәрҙәре электроника менән бәйле булғандарҙы, икенсеһенә БПЛА операторҙарын туплайбыҙ. Айтишниктар, программалаусылар төркөмө лә бар. Был белгестәр ҙә пилотһыҙ системалар ғәскәрҙәрендә ҙур һорау менән файҙалана. Шулай уҡ дрондар йыйған, яйлап улар менән эш итергә өйрәнгән, һуңынан һынауҙар тапшырып, пилоттар төркөмөнә күсеүселәр ҙә бар", - тип һөйләй Редвал Неволин. Әлбиттә, төп әҙерлек курсы Ҡораллы көстәр полигондарында һәм подразделениеға килгәс үткәрелә. Өфөлә иһә буласаҡ БПЛА операторҙары һайлап алына.

Ҡасим ҒӘҘЕЛШИН әҙерләне.
"Киске Өфө" гәзите, №24, 19 - 25 июнь 2026 йыл

КИРЕ СЫҒЫРҒА