"Урал" позывнойлы яугир Махсус хәрби операцияла пилотһыҙ осоу аппараты операторы булып хеҙмәт итә. Ул МХО зонаһына үҙ теләге менән, Рәсәй Оборона министрлығы менән контрак төҙөп китә.

Уның һүҙҙәренсә, БПЛА операторҙары бөгөн армияла бик кәрәкле һәм мөһим белгес һанала. Уларҙың оҫталығына, тәжрибәһенә хеҙмәттәштәренең ғүмере лә, подразделениеның хәрби уңышы ла бәйле. Шуға ла алғы һыҙыҡта пилотһыҙ осоу аппараттары менән эшләй белгән яугирҙар юғары баһалана. Утты-һыуҙы үткән "Урал" дрон операторҙары хеҙмәтенең хәүефһеҙ булыуын да һыҙыҡ өҫтөнә ала.
Хәрби хеҙмәткәр әйтеүенсә, яңы хәрби һөнәрҙе тәүге осорҙа һуғыш яланында өйрәнергә тура килһә, бөгөн махсус әҙерлекле йәштәр килә. "Әгәр йәшең тап килә, энергияң һәм дәртең ташып тора, шулай уҡ компьютер уйындарына әүәҫ икәнһең, урының беҙҙең янда. Әлбиттә, психологик яҡтан көслө булырға тейешһең. БПЛА подразделениелары урындарҙы разведкалай, дошмандың терәк көстәрен, техникаһын һәм тере көсөн асыҡлай һәм юҡ итә. Беҙҙең сафҡа күптәр эләгергә теләй, әммә һәр кем һайлау аша үтергә тейеш", - ти "Урал".
"Ысынлап та, пилотһыҙ системалар ғәскәрҙәре бөгөнгө көндә Рәсәй Ҡораллы көстәренең элиталы ғәскәр төрҙәренең береһе булып тора. Шуға күрә күптәрҙең БПЛА операторы булып хеҙмәт итеү мәсьәләһе менән ҡыҙыҡһыныуы һәм Оборона министрлығы менән контракт төҙөүе ғәжәп түгел", - тип асыҡлыҡ индерә Өфөләге Контракт буйынса хәрби хеҙмәткә һайлап алыу пункты офицеры капитан Фәдис Солтанов.
Пилотһыҙ системалар ғәскәрҙәренә хеҙмәткә ингән граждандар менән контракт, кандидаттың ҡарарына ярашлы, бер, ике йәки өс йылға төҙөлә. РФ Оборона министрлығы хәрби хеҙмәткәрҙе контракт ваҡыты тамамланғандан һуң хеҙмәттән ҡайтара. Был тәртип РФ Президенты указдары менән регламентлана.
Пилотһыҙ системалар ғәскәрҙәре хәрби хеҙмәткәре башҡа подразделениеларға һәм ғәскәрҙәр төрөнә үҙенең шәхси ризалығынан тыш күсерелергә тейеш түгел. Тимәк, ул фәҡәт үҙе һайлаған ошо ғәскәрҙәр системаһында ҡала. Был положение Рәсәй Оборона министрының өҫтәмә күрһәтмәһе менән нығытылған.
БПЛА подразделениеларында хеҙмәт итеү тураһында тулы мәғлүмәтте 122 телефоны аша, шулай уҡ йәшәгән урын буйынса хәрби комиссариатта алырға мөмкин.

Ҡасим ҒӘҘЕЛШИН әҙерләне.
"Киске Өфө" гәзите, №27, 10 - 16 июль 2026 йыл

КИРЕ СЫҒЫРҒА