Баш ҡаланың төп урамдарының береһе һуңғы йылдарҙа водителдәрҙе иң ныҡ көйөндөргән участкаларҙың береһе булғандыр. Һәр хәлдә, күптән көтөлә ине Зәки Вәлиди урамындағы юлды тәрән колеяларҙан азат итеү һәм юл япмаһынан ҡалҡып сығып торған ер аҫты канализацияһы люктарын рәтләү.

Ләкин был ғәмәлдең тиҙ генә башланып, тиҙ генә тамамланып ҡуйылырын берәү ҙә көтмәгәндер. Аҙ ғына ваҡыт эсендә юлдың иҫке асфальтын ҡырҙырғандан һуң, ике көн дә үтмәне, "Дортрансстрой"ҙың юл хеҙмәткәрҙәре Воровский урамынан Карл Маркс урамына тиклемге арала юлды яңыртып та ҡуйҙы. Эштәр башлыса төндәрен башҡарылды, хәрәкәт өсөн юлдың яртыһы ғына ябылып, автомобилистарға артыҡ уңайһыҙлыҡ тыуҙырылманы. Хәҙер юл һыҙаттарын һыҙып сығаһы һәм төрлө юл билдәләрен рәткә килтерәһе генә ҡалды. Шулай ҙа эшләп була икән дә!
Эйе, йәйҙәрен ҡалаларҙа һәм баш ҡалала юлдар һәм башҡа объекттар ремонтлана икәне ғәҙәти хәл. Өфө ҡала хакимиәтендә, мәҫәлән, был йәйҙә 14 юл участкаһы ремонтланасаҡ икәнен белдерҙеләр. Шуларҙың иң күләмлеһе, әлбиттә, әле генә телгә алынған Зәки Вәлиди урамындағы юл ине. Өфө - Аэропорт юлындағы колеяларҙан да биҙерәп бөткәйне водителдәр - унда ла эштәр тамамланды. Дим һәм Затондан Өфөгә илткән юлдарҙа, Менделеев һәм Пархоменко, Маршал Жуков урамдарындағы юл участкаларында ла асфальт ялтырап ята. Шулай уҡ Калинин һәм Киров райондары биләмәләрендәге баҡсасылыҡ ширҡәттәренә барыу юлдарын яңыртыу ҙа планлаштырыла. Билдәләнеүенсә, республика Башлығы һәм Хөкүмәте хуплауы менән ошо йылдар эсендә баҡсаларға илткән 36 км оҙонлоғондағы юл япмалары яңыртылған.
Өфө ҡала округы хакимиәте башлығы вазифаһын башҡарыусы Рөстәм Шәрипов юлдар ремонтлағанда ҡала карьерҙары материалдарын да файҙаланырға кәңәш итте. "Был материалдар өсөн аҡса түгергә кәрәкмәй, бөгөн ҡала бюджетын экономиялау бик мөһим", - тине Рөстәм Динислам улы.

Альмира ДӘҮЛӘТОВА.
"Киске Өфө" гәзите, №28, 17 - 23 июль 2026 йыл

КИРЕ СЫҒЫРҒА