МХО ветераны Радмир Әбүталипов хәҙер - Түбәнге Новгород юғары хәрби-инженер команда училищеһы курсанты. Был уҡыу йорто буласаҡ инженер ғәскәрҙәре офицерҙарын һәм пилотһыҙ системалар буйынса белгестәр әҙерләй.

Радмир 20 йәшендә үҙ теләге менән Махсус хәрби операция зонаһында хеҙмәт итә башлай. Хәҙер уға 22 йәш. Егет үҙе әйтеүенсә, был ҡарарға ул үҙе килә һәм бының менән ғорурлана.
- Мин әсәйемә Махсус хәрби операция зонаһына юлланыуым тураһында әйтмәнем. Полигонда бер ай әҙерлек үткәс кенә хәбәр иттем. Әлбиттә, ул ныҡ хафалана, айырыуса бәйләнешкә сығып булмаған саҡта өҙгөләнә икәнен беләм. Яраланып, госпиталгә эләккәндә, уның менән бер ай һөйләшә алманыҡ, - ти буласаҡ офицер.
Тәүге тапҡыр ул йәрәхәтте мототөркөм менән яралыларҙы эвакуациялауға алып сыҡҡанда ала. Яугирҙар дошман БПЛА-һы һөжүменә дусар була. Хәрбиҙәргә ҡараңғы төшөүен көтөргә тура килә. Әммә, төн тип тормай, тағы FPV-дрон килеп төшә. Радмир шунда, үҙе әйтеүенсә, еңелсә яралана.
Икенсегә алғы һыҙыҡта торған иптәштәрен алмаштырырға барғанда йәрәхәтләнә. Алдан атлаған яугир шартлатҡысҡа бәйләнгән йәшерен сымға баҫа. Радмир шул мәлдә, боролоп, ике аҙым яһай, ләкин ергә ҡолап өлгөрмәй. Ярсыҡтар уға ла эләгә. Тыуған көнөндә яугир ВСУ контроле аҫтында булған 700 метр асыҡ ерҙән штурмлау төркөмөнә боекомплекттар алып барып еткерә. Шул рәүешле Радмир Әбүталипов командирҙың бойороғон теүәл үтәй, штурмовиктар кәрәкле боеприпастар ала. Ошо батырлығы өсөн ул IV дәрәжә Георгий тәреһе менән наградлана.
Шулай итеп, буласаҡ хәрби-инженер һәм пилотһыҙ системалар буйынса белгес киләсәген Рәсәй Армияһы менән бәйләргә ҡарар иткән. Бөгөн йәштәр, ғөмүмән, Ватанға хеҙмәт итеүҙе өҫтөн ҡуя. Бигерәк тә пилотһыҙ системалар ғәскәрҙәре сафына эләгергә теләүселәр һаны арта. Бөгөнгө көндә Махсус хәрби операция биләмәһендә дрондар ярҙамында ҡуйылған хәрби бурыстарҙың 80 проценты үтәлә. Шуға ла Юғары баш командующий Владимир Путин һәм оборона министры Андрей Белоусов ҡарары менән Рәсәй Армияһында махсус подразделениелар булдырылған. Улар ғәскәрҙәрҙең яңы элиталы төрө һанала. Башҡортостанда ла пилотһыҙ системалар ғәскәренә йыйыу әүҙем бара.
БПЛА подразделениеларында хеҙмәт итеү тураһында тулы мәғлүмәтте башбат.рф сайтында һәм 122 телефоны буйынса алырға мөмкин. Шулай уҡ быны Өфө ҡалаһы, Революция урамы, 156 адресы буйынса урынлашҡан Контракт буйынса хәрби хеҙмәткә һайлап алыу пункты аша ла эшләп була. Ғариза Дәүләт хеҙмәттәре порталы аша ла ҡабул ителә.

Ҡасим ҒӘҘЕЛШИН әҙерләне.
"Киске Өфө" гәзите, №28, 17 - 23 июль 2026 йыл

КИРЕ СЫҒЫРҒА