Ошо көндәрҙә Өфө урамдарына электр самокаттарын ҡулланыу ҡағиҙәләре тураһында башҡорт телендә мәғлүмәт плакаттары урынлаштырылды.

Иллюстрацияларҙы кикшеринг сервистарының береһе Өфө рәссамы Зилә Шинова менән берлектә әҙерләгән. Плакаттар самокат ҡулланыусыларға хәүефһеҙлектең төп талаптары тураһында иҫкәртеү маҡсатын тотоп эшләнгән. Уларҙа - Мостай Кәрим, Салауат Юлаев, башҡорт айыуы, Өләсәй-бал ҡорто һәм милли кейемдәге ғашиҡ пар. Һәр персонаж ҡағиҙәләрҙең береһен һүрәтләй. Юл хәрәкәте ҡағиҙәләрен ошо рәүешле биреү, уларҙы республика халҡына мөмкин тиклем аңлайышлы еткерергә ярҙам итә.
Әммә ҡайһы бер яҙыуҙарҙа орфографик грамматик хаталар булыуы ла асыҡланды. Башҡортостан Премьер-министрының беренсе урынбаҫары Урал Килсенбаев социаль селтәрҙә Өфөләге яңы проектҡа ҡарата фекерен белдерҙе: "Идея бик һәйбәт һәм ваҡытлы, әммә уны урын-еренә еткереп эшләмәгәндәр, - тип белдерҙе беренсе вице-премьер. - Бынан ары башҡорт телендәге барлыҡ текстарҙы ла белгестәргә тикшереүгә биреүҙе һорайым".
Урал Килсенбаев Өфө ҡала хакимиәте ҡарамағында эшләгән "Башҡортостан Республикаһы дәүләт телдәре тураһында"ғы законды тормошҡа ашырыу буйынса комиссияға мөрәжәғәт итергә саҡырҙы. Бынан тыш, республикала эшләп килгән БР Хөкүмәте ҡарамағындағы Терминология һәм Топонимия хеҙмәттәре ярҙам итергә әҙер булыуын, "Баштәржемә" ресурсы барлығын иҫкә төшөрҙө. "Ошо мөмкинлектәр менән файҙаланығыҙ. Туған телгә килгәндә, ҡаланы биҙәүҙә хаталар булмаҫҡа тейеш".

ӘЙТКӘНДӘЙ...
Өфөлә электр самокаттарында һәм башҡа шәхси мобиль транспорт сараларында йөрөү ҡағиҙәләренә Ҡала хакимиәтенең 2024 йылдың 10 октябрендә донъя күргән 1710-сы ҡарары менән ҡайһы бер сикләүҙәр индерелгән. Документҡа ярашлы:
- төп урамдар киҫелешендә (149 урын) тиҙлек сәғәтенә 5-15 км менән сикләнә;
- парк зоналарында - 15-20 км/сәғ;
- уҡыуҙар осоронда инеп-сығыу урындары урамға ҡараған 32 мәктәп янында - 15 км/сәғ.
Электр самокаттарҙа йөрөү ҡағиҙәләрен боҙоу осрағы шаһиты булһағыҙ, фотоларҙы "Самокаттар: йәмәғәт контроле" (@samokat_ru_bot) чат-ботына ебәрегеҙ.

"Киске Өфө" гәзите, №29, 24 - 30 июль 2026 йыл

КИРЕ СЫҒЫРҒА