Пилотһыҙ осоусы аппараттар (БПЛА), Һауа һөжүменә ҡаршы оборона эше һәм уларҙы ҡулланыу эҙемтәләре фотоһын һәм видеоһын баҫып сығарыу хәүефһеҙлек менән янай. Бындай кадрҙарҙың дошман ҡулына эләгеүе һәм мөһим мәғлүмәтте асыҡларға ярҙам итеүе ихтимал.

Омск өлкәһенең бер нисә кешеһен төбәктең нефть эшкәртеү заводына пилотһыҙ аппараттар һөжүме мәлен фото һәм видеороликтар төшөрөп баҫтырғаны өсөн административ яуаплылыҡҡа тарттырҙылар.
Тыйыуға ҡарамаҫтан, улар фото һәм видео төшөрөүҙе һәм социаль селтәрҙә баҫтырыуҙы дауам иткән. Бындай материалдар паника тыуҙыра, кеше именлегенә хәүеф менән янай. Федераль хәүефһеҙлек хеҙмәте бындай мәғлүмәттәрҙе тапшырыу дәүләткә хыянат тип баһаланыуы һәм 20 йылға тиклем иркенән мәхрүм итеү төрөндәге язаға килтереүе тураһында иҫкәртә.
Башҡортостанда ла был ҡағиҙәләр ғәмәлдә. Тыйыу Башҡортостан Республикаһы Башлығының 15.09.2025 №УГ-935 Указы менән нығытыла. Уның буйынса БПЛА төрөн, уны осорған һәм ул төшкән урынды, атака объектын, килтерелгән зыянды асыҡларға ярҙам иткән кадрҙарҙы социаль селтәрҙәрҙә һәм комментарийҙарҙа таратырға ярамай. Дәүләт органдарының рәсми мәҡәләләре йәки шуларға һылтанып яҙылған мәғлүмәт иҫәпкә алынмай.
Был тәртипте боҙоусыларға Башҡортостан Республикаһының Административ хоҡуҡ боҙоуҙар тураһындағы кодексы буйынса шундай штрафтар ҡаралған: граждандар өсөн - 3 меңдән 5 мең һумға тиклем, вазифалы кешеләргә - 10 меңдән 30 мең һумға тиклем, юридик шәхестәргә - 100 меңдән 500 мең һумға тиклем.
Хәрби объекттар йәки һауа һөжүменә ҡаршы оборона эшмәкәрлеге тураһында мәғлүмәттәрҙе асҡан өсөн, шул иҫәптән дәүләткә хыянат һәм террористик эшмәкәрлеккә булышлыҡ итеү тураһындағы статьялар буйынса, енәйәт яуаплылығына тарттырыуҙары ихтимал. Мөһим деталдәр ингән осраҡлы кадрҙар ҙа зыян килтереү өсөн ҡулланылыуы ихтимал. Шикле нәмә күрһәгеҙ, төшөрмәгеҙ, шунда уҡ рәсми органдарға хәбәр итегеҙ.
Дошман социаль селтәрҙәрҙәге һәр хәбәрҙе күҙәтә. Баҫылған кадр уға киләһе атҡанда анығыраҡ төбәргә мөмкинлек бирә. Һеҙ үҙ аҡсағыҙҙы һәм азатлығығыҙҙы ғына ҡурҡыныс аҫтына ҡуймайһығыҙ, ә дошманға ярҙам итәһегеҙ.

"Киске Өфө" гәзите, №29, 24 - 30 июль 2026 йыл

КИРЕ СЫҒЫРҒА