Башҡортостанда Пилотһыҙ системалар ғәскәрҙәренә йыйыу иғлан ителде. Яңы подразделение данлыҡлы яҡташыбыҙ, хәрби осоусы, Бөйөк Ватан һуғышында ҡатнашыусы, ике тапҡыр Советтар Союзы Геройы Муса Гәрәев исемен йөрөтәсәк. Республика Башлығы Радий Хәбировҡа хәрби частарҙың береһе вәкилдәре ошо тәҡдим менән мөрәжәғәт итте.

"Мин был башланғысты хупланым. Ни өсөн? Беҙҙең йәштәр араһында Пилотһыҙ системалар ғәскәрҙәрендә хеҙмәт итергә теләүселәр күп. Был - Ҡораллы көстәрҙең элитаһы, ул - беҙҙең армияның киләсәге.
Ирекмәндәргә хәрби бурыстарҙы хәл итеү өсөн кәрәкле бөтә нәмәне даими рәүештә бирәбеҙ. Шул уҡ ваҡытта яҡташлыҡ тойғоһо ҙур әһәмиәткә эйә, ул өйҙән алыҫ булғанда ярҙам итә һәм берләштерә. Шуныһы мөһим, яңы подразделениеға контракт буйынса хеҙмәт иткән яҡташтарыбыҙ өсөн ҡаралған бөтә түләүҙәр буласаҡ", - тип хәбәр итте Радий Хәбиров.
Муса Гәрәев исеме - Башҡортостан өсөн юғары батырлыҡ һәм Ватанға тоғро хеҙмәт итеүҙең тере символы. Муса Ғайса улы республикала ике тапҡыр Советтар Союзы Геройы булған берҙән-бер кеше. Легендар летчик-штурмовик Бөйөк Ватан һуғышы йылдарында 250 хәрби осош яһаған.
Һуғыштан һуң Муса Гәрәев үҙен йәштәрҙе патриотик тәрбиәләүгә бағышлай, ДОСААФ-тың Башҡортостан өлкә комитетын етәкләй. Бөгөн уның батырлығы айырыуса әһәмиәткә эйә. Шуға күрә республикала булдырылған яңы Пилотһыҙ системалар батальонының уның исемен йөрөтөүе ғәҙел һәм дөрөҫ.
БПЛА батальонын ойоштороу мәсьәләһе буйынса Рәсәй Геройы капитан Тельман Уралбаев яуаплы буласаҡ. Ул пилотһыҙ система хеҙмәте начальнигы вазифаһын ваҡытлыса башҡарыусы. Күптән түгел Радий Хәбиров хәрби офицерҙы генерал Шайморатов миҙалы менән бүләкләне. Был хәрби ҡаҙаныштарҙы ғына түгел, ә яугирҙың шәхси батырлығын да таныу булды.
Геройҙың түшендә ялтыраған Алтын Йондоҙҙо Тельман Уралбаев Донецк Халыҡ Республикаһында Красноармейск (Покровск) ҡалаһын азат иткәндәге батырлығы өсөн алды. Ул беҙҙең яугирҙар алдында торған иң ҡатмарлы бурыстарҙың береһе булды. Уны быйыл Ватанды һаҡлаусылар көнө алдынан РФ оборона министры Андрей Белоусов тапшырҙы.
"Ике тапҡыр Советтар Союзы Геройы Муса Гәрәев исемендәге батальонда хеҙмәт итеү - хөрмәт һәм ғорурлыҡ ҡына түгел, ҙур яуаплылыҡ та. Унда Башҡортостандан сыҡҡан кешеләр хеҙмәт итәсәк", - тине Тельман Уралбаев.
Уның һүҙҙәренсә, һәр хеҙмәткәр контракт төҙөр алдынан махсус һайлап алыу үтәсәк, йәғни дрондар менән эшләү теорияһын һәм практикаһын өйрәнәсәк. Артабан буласаҡ дроноводтар дислокация пунктына юллана, унда уларҙы дөйөм ғәскәри һәм махсус әҙерлек көтә. "Өс ай самаһы уҡыясаҡтар. Әммә миндә бер аҙна эсендә лә, бер айҙа ла материалды үҙләштергән осраҡтар булды. Беҙҙең тәжрибәле инструкторҙар бик көслө, улар һөҙөмтәгә тиҙ өлгәшә. Улар егеттәрҙе ике ай эсендә профессиональ хәрбиҙәргә әйләндерә. Әммә күп нәмә контрактсыларҙың үҙҙәренә, уның ни өсөн фронтҡа барыуына бәйле. Мин 18 йәштән 30 йәшкә тиклемге хәрби хеҙмәткәрҙәрҙе ҡабул итәм. Был БПЛА операторҙары. Әммә 30 йәштән өлкән, 35 йәшкә тиклемге яугирҙар ҙа бар. Улар Пилотһыҙ системалар ғәскәрҙәрендә талап ителгән башҡа һөнәрҙәргә уҡый. Иҫәп операторҙары, саперҙар, водителдәр һәм башҡалар кәрәк", - тине Тельман Уралбаев.
"Хәҙер Рәсәй Ҡораллы көстәре бик юғары һөҙөмтәләргә өлгәште. БПЛА операторҙары дошман дроноводтарға барып етә алмаҫлыҡ алыҫлыҡта эшләй. Шуны ла билдәләп үтергә кәрәк: барыһы ла хәрби хеҙмәткәрҙең үҙенә бәйле. Әгәр ул вайымһыҙлыҡ күрһәтмәһә һәм йөҙ процентҡа тырышып эшләһә, ул йәшәйәсәк", - тип, һыҙыҡ өҫтөнә алды Тельман Уралбаев.
Рәсәй Геройы Башҡортостан Башлығы Радий Хәбиров хаҡында шулай тип һөйләне: "Күптән түгел генә таныштыҡ. Быға тиклем Радий Фәрит улын телевизорҙан ғына күргәнем бар ине. Күренеүенсә, ул ихтыярлы, көслө, етди, тәүәккәл кеше, лидер, командир. Үҙ халҡы өсөн бик ныҡ борсолған һәм кешеләрҙең лайыҡлы йәшәүен талап иткән кеше. Радий Фәрит улына Башҡортостандан хеҙмәттәштәремдең күп булыуын һәм улар менән ғорурланыуымды әйттем. Улар геройҙар, ҡыйыу, тәрбиәле һәм тәүәккәл кешеләр. Минең батальонымдың 70 проценты республика хәрбиҙәренән тора. Беҙ бергәләп Красноармейскты азат итеүҙә ҡатнаштыҡ һәм ҡуйылған бурысты лайыҡлы үтәнек. Ҡайһы берҙәре хәҙер өйҙә инде. Республика Башлығы Махсус хәрби операцияла ҡатнашыусыларға һәм ветерандарға ҙур ярҙам күрһәтә. Улар үҙҙәренә ярҙам итеүҙәре хаҡында һөйләй һәм был беҙҙең көндәрҙә бик мөһим".
Тельман Уралбаев Ырымбур өлкәһенең Андрианополь ҡасабаһында тыуған. Әйткәндәй, хатта тораҡ пункттың исемендә лә рус-төрөк һуғыштарының береһендә Ватан армияһының еңеүе тарихы яҙылған. Шуға күрә офицерҙың күңелендә еңеүгә ынтылыш тойғоһо булыуы ғәжәп түгел. Уның өсөн ағаһы Руслан өлгө булып тора. Тельман үҙе армия хеҙмәтенән һуң контракт төҙөй, Сүриәлә хеҙмәт итә. Ә 2022 йылда, Махсус хәрби операция башланғас, үҙ теләге менән фронтҡа китә. Шул ваҡыттан алып һалдат взвод командирынан батальон командирына тиклем юл үтә. Әлеге ваҡытта 506-сы полктың мотоуҡсылар батальоны менән командалыҡ итә.

Эдуард ҠУСҠАРБӘКОВ.
"Киске Өфө" гәзите, №32, 14 - 20 август 2026 йыл

КИРЕ СЫҒЫРҒА