Башҡортостанда айырым пилотһыҙ системалар батальоны ойоштороу эштәре йәйелдерелде. Республика Башлығы Радий Хәбиров белдереүенсә, был - көн талабы. Ҡарар ҡабул итеүгә хәрби частарҙың береһендә хеҙмәт итеүсе яҡташтарыбыҙҙың мөрәжәғәте этәргән.

Пилотһыҙ системалар ғәскәрҙәрендә хеҙмәт итеү хәрби бурыстарҙы үтәү менән бергә робот техникаһы, радиоэлектроника һәм IT өлкәһендә уникаль тәжрибә алыу мөмкинлеген бирә. Хеҙмәттең төп өҫтөнлөктәре булып юғары технологиялы әҙерлек тора. Ул үҙ эсенә пилотаж, программалау, 3D-моделләү, элемтә һәм пилотһыҙ системаларҙы ремонтлау буйынса күнекмәләр, разведка, дрондар һәм радиоэлектрон көрәш системалары өлкәһендә яңы ватан өлгөләрен өйрәнеү кеүек практикаларҙы ала. Был компетенция хәрби хәрәкәттәр ваҡытында ла, граждандар хеҙмәтендә лә талап ителә.
Башҡортостанда контрактҡа ҡул ҡуйған хәрби хеҙмәткәрҙәр бер тапҡыр бирелә торған 1,4 миллион һум аҡса ала. Өфөнән контракт төҙөүселәргә өҫтәмә рәүештә 600 мең һум ҡала субсидияһы түләнә.
Айлыҡ аҡсалата хеҙмәт хаҡы, вазифаға, хәрби дәрәжәгә ҡарап, яҡынса 220 мең һум тәшкил итә.
Билдәләнгән түләүҙәрҙән тыш, дошмандың хәрби техникаһын юҡ иткән өсөн 50 меңдән 500 мең һумға тиклем түләүҙәр ҡаралған. Танкты йәки идара итеү ҡоролмаһын ҡулға төшөрөү бер миллион һумға баһалана.
Башҡортостанда МХО-ла ҡатнашыусыларға һәм уларҙың ғаиләләренә ярҙам итеү буйынса күп һанлы саралар ғәмәлдә. Балаға айлыҡ пособиелар хәрби хеҙмәткәрҙең килемен иҫәпкә алмайынса тәғәйенләнә. Ғаиләләр балалар баҡсаһы өсөн түләүҙән азат ителә. Балалар мәктәптәрҙә һәм колледждарҙа бушлай ҡайнар аш менән тәьмин ителә.
Яугирҙар һәм уларҙың яҡындары өсөн республика шифаханаларына бушлай юлламалар ҡаралған. Шулай уҡ балалар һауыҡтырыу лагерҙарына йөрөй ала, ә уҡырға ингәндә махсус квота буйынса бюджет урындарына конкурстан тыш үтеү хоҡуғына эйә.
Контрактсылар мөлкәткә һалым түләүенән тулыһынса азат ителә, транспорт һәм ер һалымдары буйынса льготаларға эйә. Хәрби хеҙмәткәрҙәргә кредит каникулдары бирелә. МХО-ла ҡатнашҡан осор страховка стажына икеләтә күләмдә инә. Юғары уҡыу йорттарында уҡыған студенттар академик отпуск алыу мөмкинлегенә эйә. Түләүле нигеҙҙә уҡығандар хеҙмәттән һуң бюджет урындарына дәғүә итә ала.
Хеҙмәте тамамланғандан һуң хеҙмәткәрҙәргә хәрби хәрәкәттәр ветераны статусы, тейешле льготалар бирелә.
Башҡортостандың айырым пилотһыҙ системалар батальоны составына инергә теләгәндәр Өфө ҡалаһы, Октябрь революцияһы урамы, 3 адресы буйынса мөрәжәғәт итә ала. Шулай уҡ +7 995 948 65 41 телефон һандарына шылтыратып та ҡыҙыҡтырған һорауҙар тураһында белешергә мөмкин.

Ҡасим ҒӘҘЕЛШИН әҙерләне.
"Киске Өфө" гәзите, №33, 21 - 27 август 2026 йыл

КИРЕ СЫҒЫРҒА