"Киске Өфө" гәзитенең бай йөкмәткеһе, ундағы фекер киңлеге оҡшай миңә. Ҡул аҫтында ятҡан сентябрь һандарының береһен алдым (һайлап та торманым) һәм байҡау яһарға булдым әле.

"Зыялылар майҙаны"нан башланып китә ул. "Бөгөнгө еңел булмаған осорҙа замандаш зыялыларҙың үҙ халҡына әйтер һүҙе ниндәй булыр?" тигән һорау бирелә уҡыусыға. Был һанда Күгәрсендән төҙөүсе Илнур Шәғәлиев киҫкен хәлдәргә һәр саҡ әҙер булырға саҡыра һәм ундай осраҡта үҙеңде нисек тоторға кәңәштәр бирә.
Өфө хәлдәре менән дә таныштыра баҫма. Мәҫәлән, Пугачев урамында юл төҙөлөшө тамамланған икән. Туғандарыбыҙ баш ҡалала йәшәй, һәм бының күптән көтөлгән ваҡиға икәнен беләбеҙ, яңылыҡты гәзиттән уҡып, улар менән бергә ҡыуандыҡ. "Гүзәл-Данс" бейеү ансамбле етәксеһе Гүзәл Исламғолова менән әңгәмәне ҡыҙыҡһынып уҡыным. Ундағы фекерҙәр үҙенә күрә асыш та булды минең өсөн. Эйе, һәр һан һайын сығып килгән әңгәмәләр шәхестәребеҙ, мәҙәниәтебеҙ, төрлө өлкәләрҙән ваҡиғалар тураһында бай мәғлүмәт бирә.
Ленин музейы, биология фәндәре докторы Сәфәрғәле Йәнтүриндың үҫемлектәр донъяһы хаҡында тағы ҡайһы баҫмала уҡыр инек әле! Шулай асыштарға бай баҫма ул "Киске Өфө". Назия Бикбованың "Белгәнеңде һөйләмә, ни һөйләгәнеңде бел" мәҡәләһе уйландырҙы. Ысынлап та, мәғлүмәткә иҫ киткес бай заманда йәшәйбеҙ. Тик шуныһы, уны дөрөҫ файҙаланабыҙмы һуң? Автор менән тулыһынса килешәм: һәр хәбәрҙе ысынбарлыҡ икән тип ҡабул итеү, уға ышанып, донъяға таратыуҙа ҡатнашыу - оло гонаһ. "Киске Өфө" гәзите иһә төплө, фундаменталь материалдарҙы ғына ҡуя үҙ биттәренә. Ул - милләтебеҙҙең киләсәген ҡайғыртҡан баҫма. Уға яҙылайыҡ, уны уҡыйыҡ.

Рәйлә БАЙҒОТЛИНА,
мәғариф ветераны.
Баймаҡ районы Ишмырҙа ауылы.
"Киске Өфө" гәзите, №43, 30 октябрь - 5 ноябрь 2026 йыл

КИРЕ СЫҒЫРҒА