Ике тапҡыр Советтар Союзы Геройы Муса Гәрәев исемендәге пилотһыҙ системалар батальоны сафын башлыса йәштәр тулыландыра, ти Башҡортостан Башлығының Рәсәй Милли гвардияһы ғәскәрҙәре менән хеҙмәттәшлек буйынса кәңәшсеһе Артур Йомағужин. Быны ул яңы төр ғәскәрҙең элиталы булараҡ танылыуы менән аңлата.

- Беҙ юғары һәм урта уҡыу йорттарында даими булабыҙ. Махсус хәрби операция биләмәһендәге хәлдәр тураһында мәғлүмәт бирәбеҙ, Рәсәй Оборона министрлығы менән махсус килешеү шарттарын аңлатабыҙ. Хеҙмәткә яҙылырға теләүселәр күп. Студенттарға хеҙмәт итеү осорона академик отпуск бирелә. БПЛА менән эшләү буйынса алған тәжрибәһен хеҙмәттән ҡайтҡан егеттәр тыныс тормошта газ һәм нефть тармаҡтарында, ауыл хужалығында, көс структураларында, Ғәҙәттән тыш хәлдәр министрлығында һәм башҡа бик күп өлкәләрҙә ҡуллана ала. Шуны айырым билдәләп үтергә кәрәк: республикала һәм тотош илдә яугирҙарға, уларҙың ғаилә ағзаларына киң дәүләт ярҙамы саралары, льготалар һәм социаль гарантиялар ҡаралған, - ти Артур Йомағужин.
Контракт төҙөгән яугирҙар менән даими бәйләнеш булдырылған. Төбәк Башлығы кәңәшсеһе белдереүенсә, йәштәр башлыса тиҙ өйрәнеү һәләтенә, яҡшы реакцияға, техник фекерләүгә эйә, тәрән эрудициялы. Ғөмүмән алғанда, Башҡортостан батальондары тәүге көндәрҙән үк МХО биләмәләрендә үҙҙәрен лайыҡлы күрһәтә, бөтә йүнәлештәрҙә лә һөҙөмтәле хәрби хәрәкәт алып баралар.
Бөгөнгө көндә Махсус хәрби операция биләмәһендә ҡуйылған хәрби бурыстарҙың 80 проценты дрондар ярҙамында үтәлә. Шуға ла Юғары баш командующий Владимир Путин һәм оборона министры Андрей Белоусов ҡарары менән Рәсәй Армияһында махсус подразделениелар булдырылған. Улар ғәскәрҙәрҙең яңы элиталы төрө һанала.
Муса Гәрәев исемендәге пилотһыҙ осоу аппараттары ғәскәрҙәре батальонын формалаштырыу, уға ҡағылышлы башҡа мәсьәләләр республика Башлығының шәхси контролендә, тип һыҙыҡ өҫтөнә ала Артур Йомағужин. Ошо көндәрҙә батальонға "Урал" автомобиле, пилотһыҙ осоу аппараттары һәм башҡа кәрәкле әйберҙәр ебәрелгән.
Батальонды формалаштырыу дауам итә. Пилотһыҙ осоу аппараттары операторҙарынан тыш, водителдәр, механиктар, электриктар һәм башҡа белгестәр кәрәк.
Хәрби хеҙмәткә ҡағылышлы үҙҙәрен ҡыҙыҡһындырған һорауҙар менән һәр кем Өфө ҡалаһы, Октябрь революцияһы урамы, 3-сө йорт адресы буйынса мөрәжәғәт итә ала. Телефон номерҙары: +7 995 948-65-41, +7 908 358-00-00.

Ҡасим ҒӘҘЕЛШИН әҙерләне.
"Киске Өфө" гәзите, №44, 6 - 12 ноябрь 2026 йыл

КИРЕ СЫҒЫРҒА