"Һылыуҡай - 2014" Республика гүзәллек бәйгеһендә Рәми Ғарипов исемендәге 1-се Башҡорт республика гимназия-интернаты уҡыусыһы Раушания Юлдыбаева Гран-при яуланы.

Әле унынсы класта белем алып йөрөгән 16 йәшлек Йылайыр ҡыҙының яратҡан шөғөлдәренең береһе - бейеү. Ә киләсәктә ул балалар өсөн башҡорт театр мәктәбе асырға хыяллана. Конкурста беренсе урынға Санкт-Петербургта йәшәүсе Алина Байзакова, икенсе урынға Учалы һылыуы Лилиә Вилданова, өсөнсө урынға Ейәнсура районынан Ләйлә Харисова лайыҡ булды. Төп урындарҙан тыш, "Нәфис һылыуҡай", "Нурлы һылыуҡай", "Моңло һылыуҡай", "Иманлы һылыуҡай" кеүек номинациялар ҙа тапшырылды. Башҡорт һылыуы исеменә Башҡортостандан ғына түгел, ә Мәскәүҙән, Санкт-Петербургтан, Магнитогорскиҙан килгән 12 бәйгесе көс һынашты.
Быйыл 22-се тапҡыр уҙғарылған һылыулыҡ бәйгеһендә ҡатнашыусы ҡыҙҙар алдына ла, йылдағыса, туған телен, мәҙәниәтен, халыҡ йолаларын, ғөрөф-ғәҙәттәрен мотлаҡ белеү төп талап итеп ҡуйылғайны. Был талаптарҙың барыһы ла үтәлмәһә лә, ҡыҙҙар, ысынлап та, йөҙ-ҡиәфәте менән бик һылыу ине. Әммә һылыулыҡ... сәхнәлә, туйҙа кәрәк, ә был донъяла кеше булып йәшәү, артабан үҙ тоҡомоңдо, милләтеңде дауам итеү өсөн, әлбиттә, туған телеңде, үҙ халҡыңдың мәҙәниәтен биш бармағыңдай белеү мотлаҡ. Был турала хәҙер йәштәр араһында ла күп һөйләнелә. Әлеге конкурстан һуң да яңғыраны унда ҡатнашыусыларҙың туған телендә матур итеп һөйләшә белмәүе тураһындағы фекерҙәр. Тимәк, конкурсты ойоштороусылар киләсәктә быны төп талап итеп алырына өмөт итәйек.

КИРЕ СЫҒЫРҒА