Төп эшмәкәрлеге йәш быуынды тәрбиәләүгә йүнәлтелгән Мостай Кәрим исемендәге Милли йәштәр театры быйыл 25-се юбилей миҙгелен асты. Балалар һәм үҫмерҙәр, йәштәр өсөн ижад итеүҙең төп нескәлеге һәм ҡатмарлығы нимәлә?

Рөстәм ХӘКИМОВ, Милли йәштәр театры режиссеры: Күптәр балалар һәм йәштәр өсөн ижад итеүҙән еңелерәк нәмә юҡ, тип уйлайҙыр. Уларҙы сәхнәлә көлдөрә алһаң, шул етә, тип уйлаған булһаҡ, театр бөгөнгө кимәленә етә алмаған булыр ине. Бәләкәй балаға ла өлкән кешегә ҡараған кеүек, тиң ҡараш булырға тейеш. Шул саҡта ғына актер һәм улар араһында бәйләнеш барлыҡҡа килә. Ғөмүмән, театрҙы өлкәндәр өсөн, йәки балалар өсөн ижад итеүсе театрға бүлеп ҡарауҙы хупламайым. Театр ул - йә бар, йә юҡ. Балалар өсөн тәғәйенләнгән спекталдә лә өлкәндәр донъяһына хас проблемалар күтәрелә. Әкиәтме ул, ниндәйҙер риүәйәтме, уларҙың һәр береһенең нигеҙендә етди темалар ята. Әгәр ҙә театр бөгөнгө йәш быуындың күңелен аңлап, улар менән диалогҡа инергә тырыша икән, шул саҡта ғына үҙенең маҡсаттарына өлгәшә ала. Әлбиттә, заманалар менән бергә, йәштәрҙең ҡыҙыҡһыныуҙары ла үҙгәрә. Уларҙың бөгөн йырҙары ла, көйҙәре лә, бейеүҙәре лә башҡараҡ. Бер телдә һөйләшеү өсөн иң тәүҙә уларҙы тәнҡитләргә түгел, ә аңларға тырышырға бурыслыбыҙ. Дөрөҫ йәшәү тураһында фәлсәфә һатыу еңел ул. Һин йәш кешене нимә насар, нимә яҡшы икәнен айырырға өйрәтеп ҡара. Унан һуң, заманалар үҙгәрһә лә, мәңгелек ҡиммәттәр шул көйө ҡала бит. Һәр дәүерҙә лә мөхәббәт - мөхәббәт булып, дуҫлыҡ - дуҫлыҡ булып, иман - иман булып ҡаласаҡ. Мәрхәмәт, изгелек, үҙ көсөңә ышаныс, тормошто яҡты буяуҙарҙа ғына күрә белеү ҙә юғары баһалана. Был сифаттар күңелендә гармония булған кешелә генә өҫкә ҡалҡып сыға ала, шуға ла театрҙың төп бурыстарының береһе - баланың күңел бөтөнлөгөн тәрбиәләү, изгелектең гел генә яуызлыҡтан өҫ-төн булыуына ышаныс уятыу. Бындай бала үҫкәс тә үҙен борсоған һорауҙарға яуаптар эҙләп, театрға киләсәк. Театр уның өсөн ниндәйҙер рухи таҙарыныу кисерә торған урынға әүереләсәк.

КИРЕ СЫҒЫРҒА