Көн һайын уҡ булмаһа ла, ваҡыт табып, интернет селтәрендә көнүҙәк яңылыҡтар һәм хәбәрҙәр менән танышып барырға тырышам, ләкин уларҙың береһе лә хәтерҙә оҙаҡ һаҡланмай. Ә гәзиттән уҡыһаң, бар мәғлүмәт мейегә һеңеп ҡала. Был, бәлки, уҡыуға булған ғәҙәттән дә киләлер, сөнки беҙ бала саҡта гәзит-журналдар ғына мәғлүмәт сығанаҡтары булды. Шуға күрә әлеге ваҡытта ла ваҡытлы матбуғаттан айырылған юҡ. Йылдан-йыл хаҡтар тешләшһә лә, гәзит-журналдарға яҙылып барам һәм улар араһында иң яратып уҡығаным - "Киске Өфө" гәзите.
"Киске Өфө" - һәр ваҡыт ҡул аҫтында булырға тейешле баҫмаларҙың береһе. Гәзит күп төрлө өлкәне яҡтыртыуы, шулай уҡ республикала барған хәл-ваҡиғалар тураһында мәғлүмәтте ентекле һәм үҙ ваҡытында бирә барыуы менән хуплауға лайыҡ. Тағы ла"Киске Өфө" үҙ биттәрендә йәштәр өсөн ҡыҙыҡлы һәм фәһемле сығыштар баҫтыра. Был йәш быуын аңына үҙҙәренең уңышҡа өлгәшкән тиҫтерҙәренән өлгө алып йәшәргә һәм эшләргә тигән аҡылды һеңдерә. Йәштәрҙе гәзиткә ылыҡтырыу өҫтөндә әүҙем эшләү дөрөҫ һәм мөһим аҙым, сөнки нәҡ улар гәзиттең иртәгәге уҡыусылары, уның тиражын арттырыусылар.
Баш ҡалала йәшәүсе булараҡ, Өфөгә ҡағылышлы һәр мәҡәләне, мәғлүмәтте ентекле уҡып сығам. Ҡала нисек йәшәй, нисек "тын ала", ҡайһы өлкәһе "сирләй", ниндәй өлкәлә юғары бейеклеккә өлгәшкән - барыһы ла ҡыҙыҡ беҙҙең өсөн. Шуға күрә артабан да гәзит биттәрендә ошо даирәнең киң яҡтыртылыуына ышанам.
Хат яҙыуын яҙғас, үтенесемде лә әйтеп үтәйем. "Киске Өфө"лә төрлө өлкәлә булған асыштар хаҡында бәләкәй генә рубрика алып барылһа ине, тигән теләк бар. Көн һайын ғалимдар иҫ киткес фәнни асыштар яһай, йомро баштар шаҡ ҡатырлыҡ әллә нимәләр уйлап таба. Интернетта улар тураһында мәғлүмәт табырға була, әлбиттә, ләкин, беренсенән, барыһының да донъя селтәрендә ултырыу мөмкинлеге юҡ. Икенсенән, көн дә "Бөгөн ниндәй асыш булды икән?" тип, интернетта эҙләп ултырып булмай, ә ул хаҡта алдыңа килеп ятҡан гәзиттә баҫылһа, рәхәтләнеп уҡыйһың.
Халыҡ өсөн оло әһәмиәткә эйә баҫманың киләсәге ныҡ һәм ышаныслы булыуына, уның һәр һанын яратып, көтөп алыусы уҡыусыларының йылдан-йыл арта барыуына өмөт итәм.

Флүр АҠСУРИН.

тураһын әйткәндә...
ШӨКӘРӘ КИПТЕРЕРГӘ ЯҘМАҺЫН ИНДЕ...

Егеттәр, еңдәрегеҙҙе һыҙғанығыҙ! Күктән ергә төшөгөҙ. Ергә аяҡ терәгеҙ. Юҡһа, инвестор ҙа инвестор, тип баш ватаһығыҙ. Инвестор һүҙенән миндә аллергия башлана. Бер ниндәй ҙә инвестор беҙҙең ауылдарға аҡса һалмаясаҡ.

ата-әсә ҡолағына
БАЛАЛАРЫБЫҘ БЕҘҘЕ ҠАБАТЛАЙ

Ата-әсәһенә ике тамсы һыу һымаҡ оҡшаш балалар була. Ҡайһы саҡта теге йәки был баланы күрәһең дә, был - Фәләновтар яғына тартҡан, моғайын, шуның малайылыр (ҡыҙылыр), тип уйлап ҡуяһың. Киреһенсә, балаларына оҡшатып, атаһын йәки әсәһен таныған осраҡтар ҙа булғылай.

тарихи хәҡиҡәт
УРТА БЫУАТТАРҘА БАШҠОРТТАР ҺАНЫ

1925 йылда "Башҡорт аймағы" журналында "Башҡорттарҙың һаны" исеме аҫтында сыҡҡан мәҡәләһендә С. Мирасов XIII-XIV быуаттарҙа, йәғни Алтын Урҙа осоро ваҡытында, башҡорттарҙың һаны ете миллионға тиң булған, ә Рус дәүләтенә ҡушылғанда 3 миллионға тиклем кәмегән, тигән фекерҙе әйтә.

монолог
ТЕЛМӘРЕҢӘ ИҒТИБАРЛЫ БУЛ, ТЕРЕ ШИШМӘНЕ ҠЫЙЛАМА

Ҡағиҙә ошо рәүешле үҙгәрмәгән хәлдә, беҙ лифт саҡыртһаҡ, "лифҡа" баҫып менеп йөрөр инек. Шуға күрә, киоскыла, банкыла тип, һүҙҙәрҙе үҙгәртеп яҙыуҙың да кәрәге юҡ, беҙ киоскта, банкта тип әйтә алабыҙ.

сәйләү гәбе
ИМ БЕЛГӘН – ИМГӘНМӘҪ

Сабыйҙы күҙ тейеүҙән ҡурсыу - үҙе бер ҙур ырым. Ғөмүмән, ырым-йола белгән йүнле кеше сабыйға бер һирпелеп ҡарауҙан да тартынырға тейеш тә бит, быны хәҙер күптәр белмәй шул, үкенескә күрә...