Ошо көндәрҙә Өфөнөң Республика спортсылар әҙерләү үҙәгендә кикбоксинг буйынса Рәсәй кубогы һәм Бөтә Рәсәй турниры үтте. Ярыштарҙы БР Йәштәр сәйәсәте һәм спорт министрлығы, Рәсәй һәм Башҡортостан кикбоксинг федерациялары менән берлектә Рәсәй Федерацияһының Спорт министрлығы ойошторған. Рәсәйҙең төрлө төбәктәренән килгән 300-ләп спортсы араһында Башҡортостан спортсылары ла бар. Әле беҙ Сибай ҡалаһының "Шоңҡар" спорт клубы баш тренеры, спорт мастерлығына кандидат Хәлит Фәрит улы ҺИБӘТУЛЛИН менән әңгәмәләшәбеҙ.

Кикбоксинг буйынса ошондай ҙур ярыштар үткәрерлек булғас, был спорт төрө Башҡортостанда ла киң таралған, тип әйтеп буламы?

- Спорт төрө булараҡ, әлбиттә, ул Европала, Азияла, АҠШ-та бик киң таралған. Ә беҙҙең илдә беренсе федерация 1991 йылда ғына ойошторолдо. Спорт төрө үҙе лә сағыштырмаса яңы, ә Рәсәйҙә айырыуса йәш спорт төрө иҫәпләнә. Шулай булыуға ҡарамаҫтан, Рәсәйҙең көслө кикбоксерҙары бар. Тимур Йосоповты, Фәрхәт Имашевты, Фәнил Уйылдановты айырып әйтергә була...
Беҙҙең Сибайҙа ла был спорт төрө менән яратып шөғөлләнгән балалар һәм йәштәр байтаҡ. Бына әле Рәсәй чемпионатына биш кикбоксерҙан торған команда менән килдек. Спортсыларыбыҙҙың береһе - хеҙмәткәр, дүртеһе -БДУ-ның Сибай институты талиптары. Был ярышҡа килгән Вадим Ғүмәров тураһында айырым әйтеп үтке килә. Быйыл Екатеринбург ҡалаһында үткән Рәсәй беренселегендә ул 18 йәшкә тиклемгеләр араһында лоу-киклы фул контакт буйынса 1-се урын һәм Рәсәй спорт мастеры титулын яуланы. Бөгөн мин алып килгән командалағыларҙың бөтөнөһө лә лоу-кик төрөндә сығыш яһаясаҡ. Тағы бер бик көслө спортсыбыҙ - өлкәндәр араһында сығыш яһаусы Европа чемпионы, Донъя кубогы эйәһе, Халыҡ-ара класлы спорт мастеры Азамат Мусин яңыраҡ ҡына Словенияла үткәрелгән Европа чемпионатында еңеү (икенсе тапҡыр Европа чемпионы исемен алды) яулап ҡайтты, шуға ла әле ул ял итә, был ярышҡа килмәй торҙо. Ул 14 спортсы араһынан беренселеккә сыҡты.

Сибайҙы беҙ ушу буйынса ла, кикбоксинг буйынса ла бик көслө спортсылар тәрбиәләгән мәктәп тип беләбеҙ. Заманында Тимур Кәримов бер нисә тапҡыр донъя кубогына лайыҡ булды... Ә бөгөнгө еңел булмаған осорҙа көрсөк ғәләмәте һеҙҙең эшкә ныҡ тәьҫир итәме?

- Һиҙҙерә. Ауырлыҡтар һуңғы ике йыл эсендә бермә-бер артты. Ситтә үткән ярыштарға барырға аҡса табыуы ауырлашты. Шунлыҡтан, уларҙа һирәгерәк ҡатнашырға тура килә. Беҙ, спортсылар, финанслау тигән нәмәгә аяғыбыҙ-ҡулыбыҙ менән бәйлебеҙ бит. Ни өсөн тигәндә, ҡорамалдар, кейемдәр һатып алырға кәрәк, улар туҙып ҡына тора. Бөгөн дә Өфөгә үҙ аҡсабыҙға килдек. Ни өсөн тигәндә, алдараҡ әйткәнемсә, беҙҙе спорт мастеры тигән исем алыу мөмкинлеге ылыҡтыра. Әйткәндәй, беҙгә Өфө алыҫ булһа ла, үҙебеҙҙең ут күршеләргә - Силәбе өлкәһенең Магнитогорск ҡалаһына, Силәбегә, Ҡаҙағстандың Аҡтүбә ҡалаһына, ҙурлығына-бәләкәйлегенә ҡарамай, ярыштарға йыш йөрөйбөҙ. Улар ҙа беҙгә килеүҙе ғәҙәт иткән. Шулай тәжрибә уртаҡлашабыҙ, бер-беребеҙҙе үҫтерәбеҙ.

Шулай итеп...
Беҙҙең бөгөнгө геройҙарыбыҙҙан Вадим Ғүмәров Өфөлә үткән Рәсәй Кубогында өсөнсө урын яуланы. Уның тренеры Хәлит Фәрит улы: "Ололар ҡорона яңы аяҡ баҫты егет. Быға тиклем үҫмерҙәр төркөмөндә генә көс һынаша ине бит. Еңеүҙәре алда уның", - тип, егеттең киләсәген яҡшыға юраны.