Мәскәүҙә "Мираҫ" фольклор, йыр һәм бейеү ансамбленең концерты уҙҙы. Данлыҡлы Өфө коллективы П. И. Чайковский исемендәге Концерт залында сығыш яһаны. Ике сәғәтлек программа төрлө халыҡтарҙың вокаль һәм бейеү композицияларын үҙ эсенә алғайны. 1812 йылдағы Ватан һуғышының 200 йыллығына арналған "Ватаным минең" тамашаһы мәскәүҙәргә айырыуса ныҡ тәьҫир итте.

- Концерт уңышлы уҙҙы. Мең ярымлыҡ зал беҙҙе ҡайнар алҡыштарға күмеп ҡабул итте. Концерт башында сәләмләү телмәре менән РФ Президенты ҡарамағындағы Башҡортостан Республикаһының Тулы хоҡуҡлы вәкиле Артур Шәйнуров сығыш яһаны. Концертта Өфө ҡала округы хакимиәте башлығы урынбаҫары Сынтимер Баязитов, ҡала хакимиәтенең мәҙәниәт һәм сәнғәт буйынса идаралыҡ начальнигы Исламетдин Мәмбәтов булды. Ә үҙебеҙҙең яңы концерт миҙгелен Өфөлә 24 октябрҙә асасаҡбыҙ, - тип һөйләне "Мираҫ" ансамбленең матбуғат секретары Марина Луговая.
2014 йылдың июненән "Мираҫ"ты халыҡ-ара конкурстар һәм ҡала йәмәғәт премиялары лауреаты Айнур Искәндәров етәкләй. Берҙәм командала художество етәксеһе, БР-ҙың атҡаҙанған сәнғәт эшмәкәре Нәфирә Иҡсанова, музыка етәксеһе, БР-ҙың атҡаҙанған мәҙәниәт хеҙмәткәре Сергей Гориченский, РФ һәм БР-ҙың атҡаҙанған сәнғәт эшмәкәре, БР-ҙың халыҡ артисы Эльвира Ғәйфуллина, балетмейстер, БР-ҙың атҡаҙанған артисы Әлфиә Тимерғәзиева эшләй. Ансамбль артистары араһында халыҡ-ара, Бөтә Рәсәй һәм республика конкурстары лауреаттары бар, уларҙың күбеһе маҡтаулы исемдәргә һәм наградаларға эйә.
Иҫегеҙгә төшөрәбеҙ: Мәҙәниәт йылы Башҡортостан менән Мәскәүҙең мәҙәни хеҙмәттәшлеге буйынса төрлө ваҡиғаларға бай. Республика делегацияһы Мәскәүҙә Мәҙәниәт йылын асыуҙа ҡатнашты, февралдә ошо уҡ П.И.Чайковский исемендәге залда Фәйзи Ғәскәров исемендәге Дәүләт академия халыҡ бейеүҙәре ансамбле сығыш яһаны. Ижади коллективтар һәм алдынғы солистар 2014 йылда Мәскәү һабантуйында үҙҙәренең иң яҡшы сығыштарын бүләк итте. Октябрҙә баш ҡаланың "Сатирикон" театрында Мәжит Ғафури исемендәге Башҡорт академия драма театрының гастролдәре үтәсәк.

КИРЕ СЫҒЫРҒА