Баш ҡаланың үҙәк урамдарында бөйөк рус һәм башҡорт шағирҙары, яҙыусыларының цитаталары яҙылған реклама щиттары ҡуйылды. Бындай реклама кампанияһы Әҙәбиәт йылына старт бирелеүҙең үҙенсәлекле символы ла булып тора.

- Был акция беҙҙең "беренсе ҡарлуғас" түгел, сөнки башҡа тематик йылдарҙа ла әсәләргә, ғаилә ҡиммәттәренә арналған әйтемдәрҙе, мәҡәлдәрҙе, яҙыусыларҙың әҫәрҙәренән өҙөктәрҙе реклама итеп урынлаштыра торғайныҡ. Ләкин уларҙың күләме аҙ булыу сәбәпле, бик күҙгә салынып барманы, ахыры. Әммә быйыл Рәсәйҙә һәм Башҡортостанда Әҙәбиәт йылы булараҡ, яҙыусыларҙың "ҡанатлы" һүҙҙәрен, мәҡәлдәрҙе күпләп урынлаштырыу идеяһын "Ҡала реклама үҙәге" МБУ-һы ла ҡуш ҡуллап күтәреп алды һәм буш торған щиттарҙы рухи аҙыҡ менән "һуғарҙы". 180 самаһы үҙенсәлекле реклама шунда уҡ халыҡтың һәм баш ҡала ҡунаҡтарының, ул ғына ла түгел, барлыҡ киң мәғлүмәт сараларының иғтибарын йәлеп итте...
Реклама щиттары Яңы йыл алдынан ҡуйылғанлыҡтан, күптәр уны байрам бүләге тип ҡабул итте һәм, "Ниһайәт, үҙебеҙҙе Башҡортостандың баш ҡалаһында йөрөгәндәй хис иттек, күңелдәр үҫеп китте", "Транспортта барғанда бер рекламаны уҡып, икенсеһендә нимә яҙылған икән, тип, түҙемһеҙлек менән ҡарап бара башланыҡ", тип тә, башҡорт милләтенән булмаған граждандар иһә, "Башҡортса яҙыуҙарҙың русса тәржемәһен биреп булмаймы, беҙ ҙә нимә яҙылғанын, ниндәй яҙыусы нимә тип әйткәнен бик белгебеҙ килә", тип мөрәжәғәт иттеләр. Әлбиттә, киләсәктә барлыҡ тәҡдимдәрҙе иҫәпкә алырға тырышасаҡбыҙ. Ә реклама щиттары йыл дауамында алмашынып торасаҡ, уларҙың йөкмәткеһе генә түгел, дизайны ла үҙгәрәсәк, - тине ҡала хакимиәтенең Гуманитар мәсьәләләр буйынса бүлек етәксеһе Зөлфиә Ханнанова.
Ғайса Хөсәйенов һәм Антон Чехов, Баязит Бикбай һәм Виссарион Белинский, Рәми Ғарипов һәм Николай Гоголь, Әнүәр Бикчәнтәев һәм Михаил Салтыков-Щедрин, Роберт Байымов һәм Федор Достоевский, Әхнәф Харисов һәм Максим Горький, Ҡәҙим Аралбай һәм Иван Гончаров, Ризаитдин Фәхретдинов һәм Николай Чернышевскийҙың һүҙҙәре, бәлки, кемделер ҡулына китап алып, һүҙ оҫталарының әҫәрҙәрен уҡырға этәргес тә булыр әле...

КИРЕ СЫҒЫРҒА