"Киске Өфө" гәзитен алдырып уҡымағандар күп нәмәнән мәхрүм, тигән фекерҙәбеҙ. Ундағы ҡайһы ғына мәҡәләне алма, уйға һалырҙай тос фекер, зиһендәрҙе яҡтыртып ебәрерҙәй фәлсәфә, күңел имләрҙәй аҡыл хазинаһы.

"Киске Өфө" гәзите - рух-йән дауаһы, күңелгә ғәм, сәм һалып, ҡуҙғытып, донъяуи мәсьәләләргә ҡараштарҙы киңәйтеп ебәреүсе баҫма. Йәмғиәттә йәшәгәс, кеше алдында төрлө юҫыҡтағы һорауҙар, проблемалар тыуып ҡына тора - береһенең осона сыҡһаң, икенсеһе килеп ҡалҡа. "Киске Өфө" гәзите айбарланып ярҙамға ташланғандай: албырғап ҡалғандың аңын уятыр, илағанды йыуатыр, тормош юлындағы маяҡтай, аҙашҡанды етәкләп алып китер, атайҙарса төплө кәңәштәр бирер, әсәйҙәрсә сабыр аҡыл менән фатиха ҡылып, юл күрһәтер рухи таяныс, ныҡлы терәк ул.
"Киске Өфө"лө халыҡ булыуыбыҙ менән бәхетлебеҙ: төрлө йәштәге уҡыусыларының зауығын ҡәнәғәтләндерерлек илһамлы, шифа булырҙай һүҙ тылсымы йөрәктәрҙе шаҡый, кешелеклелек, мәрхәмәтлелек, шәфҡәтлелек орлоҡтары сәсә, бер-береңдең ҡәҙерен белергә өндәй. Гәзитте уҡығанда уның ыңғай энергетикаһынан тау-таштар ярырҙай көс артҡандай була: кемгәлер изгелек ҡылғы, яҡшыраҡ булғы, йылы, яғымлы мөнәсәбәт, ярҙам менән мохтаждарҙың хәлен еңеләйтке килеп китә, күңел байый, иңдәрҙә ҡанат үҫкәндәй хис итәһең. Атлар аҙымдарың баҙыҡлана, һының турая, өйкәп торған, сиселмәҫтәй тойолған һорауҙарға яуаптар табып ҡыуанаһың, донъя көткәнеңдә ҡулланаһың.
"Мәңге йәшә, "Киске Өфө",
Һин бирәһең йәшәү көсө!" - тип әйтке килә, уңыштар теләп бөтөн коллективҡа.

Әлфиә ӘСӘҘУЛЛИНА,
шағирә, "Китап" нәшриәтенең балалар әҙәбиәте редакцияһы мөдире.

КИРЕ СЫҒЫРҒА