Ошо көндәрҙә баш ҡаланың өлгөлө педагогтарына һәм мәғариф өлкәһендә эшләүсе етәксе кадрҙарға Өфө ҡала округы хакимиәте башлығының Рәхмәт хаттары ташырылды.

Уҡыусылары төбәк-ара һәм халыҡ-ара олимпиадаларҙа, фәнни-ғәмәли конференцияларҙа еңеү яулаған егерме биш уҡытыусыны һәм алты мәғариф учреждениеһы етәксеһен хакимиәт башлығы Ирек Ялалов исеменән уның урынбаҫары Сынтимер Баязитов ҡотланы.
- Бөгөн Хөкүмәт тарафынан талантлы балаларҙы үҫтереү буйынса ҙур ярҙам күрһәтелә. Баш ҡалала был йәһәттән төрлө олимпиадалар, конкурстар, күргәҙмәләр, ғилми конференциялар үткәрелеп тора. Әлеге көндәге мәғлүмәттәр буйынса Өфөнөң 56 меңдән ашыу мәктәп уҡыусыһы ошо сараларҙа әүҙем ҡатнашҡан, улар араһынан ике мең биш йөҙ бала ҡала кимәленә үткән, төбәк-ара конкурсарҙа егерме биш уҡыусы еңеүсе тип табылған, йөҙ ҙә илле өсө призлы урындарға сыҡҡан. Республика һәм Рәсәй кимәлендә үткәрелгән олимпиадаларҙа Өфө ҡалаһы мәктәптәрендә белем алыусы уҡыусыларҙың һаны арта барыуы ҡыуандыра, бында педагогтарҙың һәм мәғариф учреждениелары етәкселәренең роле баһалап бөткөһөҙ. Һеҙгә, балаларыбыҙҙың талантын үҫтереүгә күп көсөн һалған алдынғы педагогтар һәм мәғариф учреждениелары етәкселәренә, артабанғы эшегеҙҙә уңыштар теләйем, фиҙаҡәр хеҙмәтегеҙ өсөн оло рәхмәтебеҙҙе белдерәбеҙ, - тине Сынтимер Биктимер улы тантанала сығыш яһап.
Баш ҡаланың төрлө белем биреү учреждениеларының 25 педагогы араһында башҡорт теле һәм әҙәбиәте, рус теле, инглиз теле, немец теле, тарих, информатика, математика, физика, биология, химия, ОБЖ, йәмғиәтте өйрәнеү предметтары буйынса уҡытыусылар бар ине. Шулай уҡ төбәк-ара һәм халыҡ-ара олимпиадаларҙа, фәнни-ғәмәли конференцияларҙа еңеү яулаған уҡыусылары һаны буйынса өлгө күрһәтеүсе учреждениелар етәкселәре - Октябрь районының 93-сө гимназияһы директоры Гүзәл Абдуллина, М.Кәрим исемендәге 158-се Башҡорт гимназияһы директоры Гөлназ Әхмәҙиева, Киров районы 153-сө лицей директоры Эльвира Минюк, Ленин районы 4-се мәктәп директоры Татьяна Фомичева, М. Исҡужин исемендәге 136-сы Башҡорт лицейы директоры Шәмсулла Хәбибрахманов, Ленин районы 39-сы гимназияһы директоры Ирина Кейекбаева ла Өфө ҡалаһы хакимиәте башлығының Рәхмәт хаттарын алды. Балаларға һүнмәҫлек нур, дәрттәр һалған мәктәп уҡытыусылары һәм директорҙарының хеҙмәтенә баһа уларҙың уҡыусылары күрһәткән өлгәштәргә бәйле икәне, алдынғы педагогтарҙың уҡыусылары ла беренселәр рәтендә булыуына тағы бер ҡат инандырҙы был тәбрикләү тантанаһы.

Йәмилә ШӘРӘФЕТДИНОВА.

КИРЕ СЫҒЫРҒА