Башҡаларҙан айырылып торһон өсөн Хоҙай Тәғәлә һәр бер халыҡҡа тел, ғөрөф-ғәҙәттәр, йолалар, хатта кейем биргән, тиелә бер башҡорт риүәйәтендә. Ысынлап та, аңлы кешегә милли костюм - мөһим сығанаҡ, ул халҡыбыҙҙың матурлыҡты нисек тәрән аңлауын сағылдырып тора. "Киске Өфө" гәзитендә милли кейемдәребеҙ менән таныштырыусы мәҡәләләр күп баҫыла. Юғары уҡыу йортонда ошо уҡ йүнәлештә студенттарға белем биргәс, мин уларҙың ҡиммәтен юғары баһалайым.

Дәүерҙәр үҙгәреп торһа ла, башҡорт бер ҡасан да үҙ асылынан ситкә китмәгән. Беҙ бөгөн дә халҡыбыҙҙың сәнғәт элементтарын ҡулланабыҙ, йолаларыбыҙҙы тотоп йәшәйбеҙ, уларҙы балаларыбыҙға өйрәтәбеҙ. Һүҙ ҙә юҡ, бөгөнгө заманда милли сәнғәткә башҡа мәҙәниәттәрҙең йоғонтоһо иҫ киткес. Шулай ҙа яйлап этник үҙенсәлектәребеҙҙе күрһәтеп торған өҫ кейеменә өҫтөнлөк бирергә ынтылабыҙ, ҡулдан килгәнсә үҙебеҙ ҙә нимәлер эшләйбеҙ.
Этномәҙәни тәрбиә лә бөгөн иң көнүҙәк урынға ҡуйыла. БДУ-ның Сибай институтында, мәҫәлән, буласаҡ технология уҡытыусылары көнкүреш предметтарына, биҙәнеү әйберҙәренә яңы һулыш өрә, уларҙы яһарға өйрәнә. Матди мәҙәниәт тә кешенең рухи байлығын байыта, тип юҡҡа әйтмәйҙәр бит. Беҙҙең студенттар башҡорт тирмәһе нисек биҙәлергә тейешлеген, башҡорт ырыуҙарының һәр береһенең милли кейемен яҡшы белә. Халыҡтың тормошон, тарихын, көнкүрешен, телен, әҙәбиәтен, рухи ҡиммәттәрен өйрәнеүҙә быларҙың ярҙамы сикһеҙ.
Гәзит уҡыусыларҙы быйылғы сығарылыш студенты Әлфиә Вилданованың милли туй күлдәге өлгөһө менән таныштырғым килә. Этник стилдә тегелгән күлдәктә кейәүгә сыҡһын ине ҡыҙҙарыбыҙ, тигән теләктән дә сығып эшләйем быны. Баҙар тәҡдим иткән күлдәктән һис тә кәм булмаған күлдәк тегергә була бөгөнгө көндә. Шулай ҙа кәләштең төп сифаты тыйнаҡлыҡ икәнен күҙ уңында тотоп, уны артыҡ биҙәү кәрәкмәйҙер, моғайын. Күлдәк оҙон, биле тотолоп тегелде, был ҡыҙҙың нәфис кәүҙәһен тағы ла матурлай. Еңдәре лә оҙон, ең ситенә юғары манжеттар тегелгән. Күлдәктең итәген шифон юбка тулыландыра, камзул шулай уҡ милли кейем элементы булып тора.
Бындай тантаналы сара өсөн күлдәкте атластан тегеү яҡшыраҡ. Ансамблде "алтын" таҫма һәм башҡорт биҙәктәре менән биҙәү ҙә уға тантана өҫтәй. Бындай күлдәктәге кәләш башҡорт ҡыҙҙарына хас йыйнаҡ, нәзәкәтле күренәсәк.

Гүзәл ВӘЛИЕВА,
педагогия фәндәре кандидаты, доцент.
Сибай ҡалаһы.

КИРЕ СЫҒЫРҒА