"Киске Өфө" гәзитенең "Бәйләнештә" социаль селтәрендәге "Башстатус" төркөмө менән берлектә иғлан иткән "Башҡорт китабы топ-100+" акцияһына сираттағы уҡыусыбыҙ ҡушылды. Ришат Зәйнәғәбдинов Ризаитдин Фәхретдиновтың "Нәсихәттәр" китабын уҡырға тәҡдим итә.
- Ризаитдин Фәхретдиновтың "Нәсихәттәре" - балалар һәм ололар өсөн яҙылған мөһим ҡағиҙәләр йыйынтығы, халыҡ педагогикаһының тупланмаһы. Был йәшәйеш ҡағиҙәләре кешегә юғары белемле һәм юғары этик нормаларға тап килгән шәхес итеп үҫешергә ярҙам итә. Унда төрлө урында, төрлө кеше араһында үҙеңде нисек тоторға, аралашырға, уҡырға, туҡланырға, ғаилә мөнәсәбәттәре, гигиена ҡағиҙәләре һәм башҡа мөһим һорауҙар буйынса мәғлүмәттәр ябай, бөтәһенә лә аңлайышлы итеп яҙылған. Автор баланың төп тәрбиәселәре - ул атай һәм әсәй тип билдәләй, кешеләргә хас етешһеҙлектәрҙе юҡҡа сығарыу буйынса бөгөнгө көндә лә бик актуаль булған кәңәштәр бирә.
"Нәсихәттәр" китабына ниндәйҙер яңылыҡ өҫтәп яҙыуы бик ауыр, сөнки ул тормоштоң бөтә яҡтарын да үҙ эсенә алған, дини һәм донъяуи белемгә нигеҙләнеп ижад ителгән. Ризаитдин Фәхретдиндең "Нәсихәттәр"ен ниндәйҙер кимәлдә Мишель Монтендең "Тәжрибәләр"е һәм Сенеканың "Луцилиоға әхлаҡи хаттар"ы менән сағыштырырға була. Был йыйынтыҡты, һис шикһеҙ, һәр кемгә өҫтәлдә, ҡул аҫтында тотоп уҡый торған китап рәүешендә тәҡдим итергә мөмкин. Сөнки һәр заманда ла "Нәсихәттәр" китабынан үҙеңә кәрәкле, ҡиммәтле бик күп мәғлүмәт табырға була. Ризаитдин Фәхретдиновтың был хеҙмәте башҡорт халҡының юғары мәҙәнилеген, әхлаҡи ҡиммәттәрен, рухи тәрбиәһен сағылдырған. Уны уҡыған һәр милләттәш үҙенә фәһем, аҡыл туплаһа, бүтән халыҡтар өсөн ул башҡорт донъяһы менән яҡындан танышыу сараһы.
Хөрмәтле гәзит уҡыусыларыбыҙ! "Башҡорт китабы топ-100+" акцияһына һеҙ ҙә ҡушылығыҙ, үҙегеҙ уҡыған башҡорт китаптары/әҫәрҙәре араһынан иң-иңдәрен һайлап, шулар тураһында редакциябыҙға төбәп хаттар яҙығыҙ. Йәки "Бәйләнештә" социаль селтәрендәге "Киске Өфө" гәзите" төркөмөндә махсус булдырылған "Башҡорт китабы топ-100+" акцияһы" тип аталған фекер алышыу битендә "#башкитап" хештегы ҡуйып үҙ фекерегеҙҙе белдерегеҙ!
МӨХӘРРИРИӘТ.
КИРЕ СЫҒЫРҒА
|